青藏鐵路開通後，唔少人都想去搭吓兼欣賞西藏風貌，立法會議員張文光噚日話，喺立會內有啲身兼港區人大代表嘅議員，正搞緊個議員青藏鐵路之行，成事嘅話會喺九月出發。講起返內地，身為中國人嘅「張文」當然好恨可以去，之不過佢係民主黨黨員兼支聯會成員，已被禁回內地十幾廿年，所以佢希望中央會畀個面人大代表，等佢掹車邊有得去西藏行一轉。
至於暑假會做乜，張文光話基本上都要留喺香港，因為教統局密謀推行中學殺校政策，佢要金睛火眼昅到實，大事當前，佢嘅旅行計劃都要推至九月，屆時會去西班牙歎吓，兼且去英國探喺嗰度讀緊大學嘅愛女，順便幫佢搬宿舍。如果青藏鐵路之行成事，佢話當然會捨棄西班牙，但就一定會去探個女。