世界盃踢完，所有嘢都好似陸續返回崗位咁，回復正常。靜咗大半年嘅樓市都一樣，終於有番啲生氣。間間發展商都吼實個市，做定準備功夫咪蝕底，隨時㩒掣賣樓。
不過，香港地產個市好怪，一係唔發市，一發就鋪天蓋地由朝玩到晚。
好似班地產代理咁，早兩個月宣傳活動幾乎停頓，佢哋亦都靜晒，世界盃一完，佢哋又開始生猛番，陣容浩瀚嘅千人誓師場面又重現。
啱啱過咗嘅一個禮拜，四間代理行連環出擊，齊齊搞大型誓師，同發展商宣傳樓盤之外，當然唔少得激勵員工下半年要搶攻。
一係冇得做 一係做天光
除咗新地就快賣嘅馬灣珀麗灣五期密密搞誓師外；前日已經賣咗百幾伙嘅灣仔嘉薈軒，噚日下晝臨時同香港置業搞誓師（唔係賣之前搞嘅咩？）；可能係未賣前，中記、美記同利仔都先後有誓師，剩番港置，所以臨時補番場，又或借啲意再博吓宣傳。
新盤市場就係咁，一係冇樓賣，一賣就通宵達旦賣天光，嘉薈軒前日就由下晝2點賣到第二日清晨5點，真係少啲精力都唔得。
大型屋苑式新盤，就算係貨尾都一樣玩誓師。恒基嘅上水御皇庭，仲有成400伙未賣，搵美聯獨家代售兼大肆催谷，目的不外想清貨。
電郵地址：[email protected]