早兩個禮拜，有舖王之稱嘅「波叔」鄧成波，將中環威靈頓街1號商場──荊威廣場放售，意向價5億，比04年嘅2.8億買入價，高2.2億。
蘭西同負責代理嘅韋堅信測量師行商業及投資部董事許偉國傾開，佢話消息一出，反應好到不得了，有10幾個投資者有興趣，包括某老牌家族同外資基金。
物業會連埋租約賣，𠵱家由大型健身中心CaliforniaFitness承租，租期到08年7月，月租155.51萬，如果賣5億，回報有3.7厘。許偉國話，完咗租約再租出去，肯定唔止呢個數。
波叔見反應咁好，梗係高興啦，仲心郁郁諗住將呢件「心肝寶貝」招標，預計兩個星期左右就會推出。咁多人有興趣，到時肯定唔止賺2.2億，波叔實笑到見牙唔見眼。