澤楷二少賣甩8號仔股份單交易，隨住梁伯韜認咗頭漸漸淡化。不過，二少買《信報》嘅消息，就愈傳愈勁。八方噚日一瞓醒，就已經有人飛電問《信報》係咪有嘢公布？晏晝係咪有飯食？
點解有飯食呢？原來，噚日《信報》老闆娘林山木太太在北角某大酒店設宴，請記者食飯——不過係佢自己公司嘅記者，唔係行家。據說《信報》七月初係三十三周年報慶，大家要做特輯做得好辛苦，所以整番餐自助餐慰勞吓班手足咁話。
條件係「編採獨立」
呢個請食飯嘅理由，連《信報》啲記者都唔信。有人話：過去五年年年都報慶，又冇飯食？有個更老資格嘅就話：過去十年，林太都未請過佢飲一杯奶茶，點會忽然去食自助餐？梗係有嘢嘅，單係老闆娘請食飯，已經係大新聞啦。
咁除咗約咗人同要做嘢唔嚟得嘅伙記之外，一眾三十幾人充滿期望咁上到去餐廳，等住聽重大宣布。點知真係食飯。除咗林太，林老闆自己冇嚟，老曹亦唔見影，其他高層就喺度。
席間林太都有評論吓賣盤事件。據在場但隻耳仔唔係幾好嘅人講，林太話要賣《信報》，原則係要保持「編採獨立」。至於乜嘢係「編採獨立」，佢同阿二少嘅理解似乎好唔同，所以阿二少近來周圍吹嘅風，呢一邊就大不以為然。林太好似仲同班伙記講話「未收過定」。
咁即係點呢？八方當然要聽吓外邊嘅風。外邊嘅講話就話單交易「原則上已經達成協議」，而自從傳出二少唔玩電盈之後，林太都着緊咗，所以呢一段緣份好快就會開花結果。佢仲叫八方去睇兩樣嘢。
八樓新租客又姓何
第一樣係去公司註冊處查吓一間叫「信報財經有限公司」嘅公司，會發覺老闆唔係林太（佢嗰間叫「信報有限公司」），而係姓何嘅。
第二，《信報》大本營喺二十二樓，但八樓都係佢哋嘅，以前租畀何弢，最近租客改咗，新租客又係姓何嘅。咁昨日嗰餐飯係咪告別宴呢？