卡通公仔通常都係女仔嘅心頭好，最近由日本傳過嚟香港嘅KERORO軍曹大受歡迎，唐寧同2R噚日去旺角出席日本卡通公仔軍曹嘅全球首部KERORO列車開幕禮，本身鍾意軍曹嘅唐寧開心不已，不斷同公仔影相，而佢同王菀之有份設計嘅軍曹公仔都有攞出嚟展覽。
收Fans相架興奮
唐寧嘅fans好有心，儀式進行期間，有個男子突然跑出嚟送咗幅有軍曹花紋嘅相架畀佢，令到唐寧好開心，不斷話好靚，愛不釋手。唐寧話：「屋企收藏咗好多軍曹嘢，我最鍾意tamama，我好想買番佢哋嘅漫畫。卡通片入面有講友情，都好感動，我試過睇到喊。」
啱啱喺日本返港嘅2R，表示當地通街可見軍曹，家姐Rosanne話：「我知佢哋係外星青蛙，好多人都有買佢哋嘅產品。」Race仲話：「我鍾意儲錢箱，軍曹都出咗錢箱，好想帶返屋企。」
