經過一個禮拜休息，今晚又有10場波畀各波友玩，開波時間更加由夜晚10點，打到晨早5點，波友又要重新投入由晚賭到朝嘅生活。
今日主打圖圖盃，心水清嘅球迷，都應該會發現原本秩序有10場波，不過馬會「挑選」之下，只開得7場；好似希臘球隊拿尼沙對土耳其嘅卡塞利、奧地利嘅列特對摩爾多瓦泰拉斯普爾，真係唔好意思，就算閣下好有心水，都唔可以喺香港賭嘞。
打歐洲賽一向有鬥志
馬會「挑選」過畀大家賭，相信唔多唔少都有暗湧；其中最大機會爆，就係馬賽對廸尼普。睇完世界盃，相信大家都認識馬賽新星列貝利，不過睇怕列貝利、巴夫斯、美廸等參加世界盃國腳，相信今場都唔會上陣。
馬賽陣容不整外，今場重要移師伊斯特尼斯球場比賽，連主場威力都冇埋，馬賽呢個法國名牌買唔過。
烏克蘭球隊廸尼普，打過2場圖圖盃第二圈，比賽狀態都算好，而且廸尼普一向打歐洲賽有鬥志，可以博吓佢哋不敗，讓球主客和「客勝」都有3.05倍㗎，大膽啲博W有8倍。
文：牽牛