下個禮拜二18號，對地產記者嚟講係大忙日，皆因好耐冇試過嘅地皮拍賣，會喺當日舉行，雖然大嶼山長沙嗰幅地豆膶咁細，賣成點對個市嘅影響有限，不過，作為久休復出嘅一次賣地盛會，大家都會落足工夫去挖料。
唔知係咪幅地太細，冇乜影響力，竟然有兩間大公司，喺嗰日齊齊搞吹風記招，而且仲係兩間鐵路公司一齊出嚟，題目咁啱都係商場項目，好彩時間唔係撞到正。九鐵講翻新完嘅屯門海翠商場，時間係兩點半，跟住三點半就到地鐵加新地，講九龍站呢個近100萬呎全新商場，仲勞動到新地郭炳江親自出馬㖭。
九年難逢一潤嘅兩鐵對壘局面，加埋單賣地新聞，睇戲碼嘅話，地鐵加新地好似大堆頭啲；但論搶眼程度，始終賣地佔優；九鐵講屯門商場，可能輸蝕咗啲，不過，九鐵好少咁高姿態講商場項目，睇嚟有啲料到。