日本人金子晴彥鍾情香港蚺蛇尖，90年代喺香港擔任日航總裁遊山玩水時候，將呢個位處西貢郊野公園東北部，高近500米嘅高峯及周圍景致，用相片及日文記低，並將佢所見所聞帶返日本，與眾同樂。
本港漁農自然護理署見到呢本書亦好感動，最近將佢對蚺蛇尖感想繙譯成中文並輯錄成書，希望港人可以睇吓日本人眼中嘅蚺蛇尖風光。
呢本書叫《蚺蛇尖傳奇》（圖），厚60頁，但就有51幅靚相，每張相仲有一段文字介紹相中靚景，美輪美奐。金子簡直係日本嘅香港旅遊大使，漁護署話自從佢返日本唱好香港，話蚺蛇尖靚到無得頂之後，有唔少日本人慕名嚟香港行山。漁護署話今次印咗5,000本中文書，每本50大元，喺下周三嘅書展率先發售，然後喺其他書局賣，如果賣晒會隨時加印。