港股裂口低開，冇法子，美日股市散定在前，自然有影響。恒指由挫低243點到埋單跌169點，H指由冇咗154點到埋單只係唔見80點，算係唔錯，市底算係咁。
中企C輪4618：H指跌，中企P輪生猛，升幅15%以上嘅有11隻，數據靚而又有大成交嘅係4842，但只係升得5%。如果睇H股仲有得跌，4842啱賭。隻輪9月尾夠鐘，輪價16.3仙，溢價5.1%，槓桿率13.6倍（有效7倍），引伸波幅34.9%。
但H指估計再跌有限，買P輪不如吼低買C輪，對象係4618。隻輪9月尾夠鐘，輪價18.7仙，溢價2.6%，槓桿率10.8倍（有效8倍），引伸波幅28.3%。
上石化C輪4701：上石化（338）收3.75元，微跌1格，但隻C輪4701則大散39%，收10.2仙，有14球易手。
隻輪已到埋單時候，本月24日最後買賣，剩番6日交易。溢價0.9%，槓桿率36.8倍（有效26倍），引伸波幅19.6%。時日無多，冇得守，博唔過。其他兩隻C輪3537與4468，一樣博唔過。
中鋁C輪9085：中鋁（2600）只跌1格，最長期嘅C輪9085跌幅最小，收23.1仙，唔見0.4%。
隻輪溢價51.1%，槓桿率得2.4倍（有效更只有1.7倍），引伸波幅去到91%。數據怪到死，皆因08年6月尾到期，冇其他同期輪可作比較，炒嚟冇意思。
章盛