當大型銀行一味削減分行之時，中小型銀行就密密擴張開店，尤其係啲非核心商業區，好似交通銀行咁，噚日佢哋東區分行，就搞咗個擴張誌慶，間行港島東嘅主管翁國慶，傍實香港分行兩個副總經理陳霞芳及須成發，同埋做主禮嘅李群華太平紳士，齊齊點睛、剪綵、睇舞獅，場面鬼咁熱鬧。
交銀話，間舖樓高兩層，八千幾呎，裝完身之後，就連地位都提升埋。事關佢係東區第一間，集零售、工商中心同通達理財嘅「三合一」分行（全港得四間咁嘅分行），即係乜客都啱，咁客路自然大增。
交銀又話，間舖係自置物業，開咗業足足45年，真係有必要換個新Look，等員工醒神啲，顧客又舒服啲。唔講唔知，個擴建工程前後搞足半年，事關要一邊營業，一邊做裝修，而間大咗又靚咗嘅分行，最吸引顧客嘅地方，唔係個舖面，而係通達理財入面個橢圓形魚缸。