恭喜！恭喜！冠軍科技及看通主席簡文樂，回歸日俾特區政府封做太平紳士，前日又獲英女皇頒授大英帝國司令勳銜（即係CBE），咁大件喜事，簡文樂索性帶埋老婆Maria，阿女仲珩，女婿EricYang，以及歲幾嘅孫女Jasmine，一齊飛過去英國，親自去到白金漢宮，喺英女皇手上接過呢個勳章，當然唔少得影番輯威水相啦！
Paul簡喺短短兩個禮拜之內，多咗兩個咁有份量嘅銜頭，仲有一大班好朋友，出錢登報紙廣告賀佢；佢隻冠軍科技都要報答吓各位，噚日逆市升咗近4個巴仙，收市報1.33。雖則佢仲未做到馬會董事，睇怕都唔使太失望！
網頁致謝免掛漏
華華睇番個祝賀廣告，有近二百幾人科水，當中大多數係公司，打正自己旗號嘅有東亞彭玉榮、電盈蘇澤光、長江製衣陳永棋，另外仲有田北俊、李健鋒、高錕教授、葉培大教授、黃龍德、香港簡氏宗親會，以及佢嘅姻親PeterYang&Family。
啲老友咁有心，搞科技嘅簡文樂都好識做，佢專登整咗個得獎網頁，再將啲致謝名單放埋入去，咁就簡單方便，事關即使掛萬漏一，都可以隨時隨地補番上去，果然係「科技人」，識得利用科技的好處。
華華睇過個網站，唔係講笑，份致謝名單由A排到Z，真係睇都有排睇，果然得人恩惠千年記！
李華華
讀者如有任何意見或報料，歡迎發送電郵至[email protected]。