個樓市靜得咁緊要，個個都唱淡，由地產分析員轉做「芬佬」嘅Cohen&Steers亞洲區執行董事張一鳴，就奉行佢「行先人一步」嘅信念，上個月又入咗市喇，今次目標係邊度？咪就係西半山嘅西摩道！佢同華華講，層樓買嚟都係投資居多，暫時都未知會唔會搬去住，至於今勻用咗幾多錢入貨，佢就死都唔講，鬼咁神秘。
雖則張一鳴唔肯講詳情，但以佢嘅往績嚟睇，03年沙士後，以3300蚊呎價買入羅便臣道單位，年尾4000蚊呎沽貨，賺過百萬；同年又以5200蚊呎價買貝沙灣，住到家吓呎價升咗成倍，環境好到唔捨得搬，佢手持嘅貨，除咗新入嘅西摩道物業之外，仲有另一個04年買嘅羅便臣道單位，前者賺蝕未知住，後者淨係賬面都已經賺近五成，成績相當唔錯。