最喜歡在烈日當空下逛街的傅穎（Theresa）笑言曬太陽令人十分開心，更享受穿少點衣服的快感。原來Theresa中學時是一名肥妹，更曾因減肥患上厭食症，現在她堅拒減肥，更趁炎夏大啖雪糕消暑，一舉兩得。
不少人都埋怨香港天氣悶熱，不過Cookies成員傅穎卻大唱反調，還謂太陽愈猛，人愈開心，她日前在香港公園邊食雪糕邊笑說：「我好鍾意夏天，愈熱就愈會出街，我從來只驚凍，唔會怕熱，而且夏天可以着少啲衫，踢人字拖出街，曬住太陽就仲開心，不過𠵱家我就冇乜點曬太陽，因為化妝師話曬得太陽多，皮膚會差。」
自製素餐
Theresa更有獨門解暑秘方，就是炮製素食餐，還煲菜湯消除悶氣。她坦言一向留意飲食，特別注重一頓豐富早餐，又自爆中學時曾是一名肥妹仔，當時體重更達120磅，由於身形過胖，令她不時被人取笑。
Theresa續說：「當時又轉咗讀精英班，壓力大好多，所以搞到我患咗厭食症，食乜嘔乜，仲試過全日只係飲水，當時體重即刻暴跌到92磅，真係好得人驚，着乜衫都冇嘢睇，自己都覺得唔靚啦，所以𠵱家會好注重飲食習慣，唔會揀飲擇食，前兩日我就因為腸胃炎入院，𠵱家我唔會keepfit，只會keepfat，因為個個都讚我肥啲好睇啲。」
男友安慰
此外，Theresa前晚出席《戀愛初歌》煞科宴時，被問到有報道指其身家甚厚的緋聞男友蘇頌智的父母嫌棄她是明星，Theresa對此說：「只係有一次同Miki打邊爐，咁啱見到佢（指蘇頌智）同父母又去同一個地方食飯，但大家未試過單獨約會，我都有打畀佢，驚佢見到報道唔開心，不過佢安慰番我叫我唔使擔心，明白呢啲新聞我控制唔到。」
採訪：駱華齡 攝影：仇志德
髮型：VincePang@IIColpo 化妝：DeborahVaughan 服裝提供：SistyrMoon
