下屆東亞運動會喺香港舉行，雖然仲有三年時間，但搞手民政事務局局長何志平唔知係咪怕人話宣傳唔夠，噚日搵埋建築署及建築師學會一齊搞個「東亞運動會場地主題設計比賽」，選咗香港大球場、香港體育館同西區公園體育館三個場地做參賽題材，冠軍獎金有成15萬咁多。
比賽分團體同個人兩種，參賽者必須係建築師學會、園境師學會或設計師學會等成員，最遲下個月11日要報名喇。搞手之一嘅建築師學會會長林雲峯話，獲獎嘅評審標準係要突出到東亞運精神同香港特色。不過搞咁多嘢，康文署官員私底下承認，得獎作品未必一定採用番喺比賽場地！
至於東亞運究竟有乜比賽項目，港協暨奧委會會長霍震霆話，已經交咗19個項目同兩個預演項目畀東亞運執委評選，相信年底就有結果。