陳太、葉太一出,政壇風雲再起。如果話香港係女人世界,咁我哋嘅前第一夫人A1董太又去咗邊呢?八方噚日喺飯局見到董太,佢好謙咁話:「我已經係過去咗嘅時代嘅人物。」董太𠵱家淨係想做好啲義務工作,例如繼續向駐港解放軍送中秋月餅,同埋搞好今年嘅「香港青少年軍事夏令營」。
就快舉行嘅軍事夏令營,第二屆嘞,依然全男班,總共收咗150個14歲至16歲嘅男仔,安排佢哋12日軍訓,仲加插三小時實彈訓練,係揸步槍嗰隻,好威猛㗎。𠵱家凡事講男女平等,即刻就有人追問幾時先可以收「少女兵團」?董太咪咪嘴笑,畀咗個不知幾幽默嘅答案:「見步行步啦。」咁證明咗啲乜?就係董太一定睇政治新聞囉。
喺香港政治舞台「息影」嘅董太,同八方講起啲少男兵哥不知幾投入。佢話去年同一班藝人去夏令營探訪少年兵哥,有藝人問:「你哋最miss(掛住)出面啲乜嘢呀?」可樂?電視劇?錯!成班男仔一齊大聲答:「女仔!」董太話自己笑到碌地之餘,都好欣賞佢哋咁坦白。
冇得瞓冷氣房冇廁所
其實,大會一直有考慮招收女仔參加軍訓,但係因為暫時只有男教官,而且都要睇吓啲設施適唔適合畀女仔用,所以仲未知幾時可以收「女兵」。冇錯,啲男仔可以接受基本軍事訓練的確係機會難得,但係,大會決定今年唔會再畀啲學生做「少爺兵」。舊年兩個人瞓一間有冷氣嘅教官房,今年冇咁歎嘞,要八個人瞓一間普通兵房,冇冷氣,冇廁所!
都啱嘅,咁都捱唔到,仲點希望佢哋可以做社會棟樑呢?籌委會主席田北辰就好希望班小兵哥聽完中國近代史之後,再學吓國防同軍事知識。講到學開槍,究竟每個學員可以用到幾多發子彈呢?田少好豪咁話:「我諗解放軍都唔會慳子彈嘅。」
講到最後,夏令營個場係喺粉嶺新圍軍營。上世紀接受過護士訓練嘅董太,好錫班細路,話唔會畀一隻蚊針到啲學員。梗係,登革熱病不可不防,所以佢哋會做足滅蚊工作。有份幫手嘅潘德鄰醫生就話已經聯絡好北區醫院,有乜損傷都冇有怕。