明星足球隊隊員羅家英、張國強、林敏驄同陳百祥（阿叻）等噚日去到喇沙書院，出席由有線兒童台舉辦嘅明星學界足球錦標賽。而有線方面解釋今次有無綫藝員出席佢哋嘅活動，因為係由足總方面邀請。
對於施丹喺決賽對意大利時用頭槌頂向馬特拉斯而被紅牌趕出場。家英哥覺得施丹一向球品都好好，仲話任何人講一啲說話去侮辱人哋就好唔應該。
阿叻都力撐施丹冇錯，佢話如果喺球場上不論細路仔又或者係好朋友出言侮辱佢屋企人，佢都會追住對方嚟打，但佢仍然好欣賞呢位亦正亦邪嘅球王。
林敏驄不忿遭抹黑
另外，之前牽涉入眾多是非中嘅林敏驄，噚日就話無綫總經理陳志雲都出聲幫佢講說話，但仍然有人攻擊佢。阿驄話咁多年來都係第一次俾人攻擊同抹黑，佢唔明搞呢件事嘅人有乜居心，仲話一個人真係有料就唔使驚人哋會搶到你嘅嘢。
