曾特首講藍天白雲，減少空氣污染，講完有乜實際行動呢？睇嚟就係除煲呔，唔着西裝，將公僕辦公室氣溫調校到恒溫二十五點五度。空氣調節（即冷氣）喺25.5度，係唔係有神奇效果呢？左丁山好懷疑。喺歐洲美國，啲環保人士通常被歸類為左派，一位丹麥名人BjornLomborg（本身係政治學家。近年搞全球問題優先次序（Prioritize）化運動，得罪晒啲環保人士）講，二百年前歐洲視左派為創新，理性人士。但左派思潮發展到如今，左派與夢想、浪漫主義掛鈎，不再理性，環保人士就係呢一類！
左丁山唔知道25.5度係邊一位科學家決定係最適中溫度嘅。即使係最權威嘅科學家講嘅，左丁山都唔服。在眾多朋友之中，人人都知左丁山最怕凍，穿衣最多。呢個兩個月嚟，左丁山做過幾次試驗。第一，在汽車內調校氣溫最易，將冷氣校到25度，猛烈太陽之下，喺吐露港公路行駛，熱到腦脹；校到最冷18度，冷風吹到肚腩唔舒服。最後校到22-23度，啱啱好。
返到屋企，室內溫度有29度。即開猛冷氣，兩個零鐘頭後，室溫降到25度，感覺唔錯，但係幾位老友嚟咗打麻雀之後，咦！唔掂噃，有人話焗，要將冷氣開大啲。如是者經過幾日實驗──開窗閂窗，開冷氣熄冷氣，老婆鬼殺咁嘈，話左丁山玩嘢。左丁山卒之有結論，如果一人在家睡覺，身穿短褲短袖T恤，心靜自然涼嘅話，25度完全冇問題，但若果做室內運動，做家務，行嚟行去，或多幾個人到訪，25度就唔多妥。公僕辦公室內，人多，文件多，氣流不暢，若定喺25.5度，啲公僕生產力肯定下降，肥佬尤其冇心機。曾特首成日話睇住民意，唔知特首辦有冇調查過公僕對25.5度嘅高見呢？運輸署內，經常有幾百人等候換車牌，25.5度嘅話，熱死人咩，以上係左丁山個人之不科學實驗，環保人士如要駁斥，請提供有說服力嘅科學測試數據證明25.5℃最適合我哋。