大大碗刨冰隊入口
「老地方」雖賣炒粉麵飯，其實主打嘅係台灣食品同特飲，刨冰就更加唔少得。成座山咁大嘅雜果刨冰（$15-$25），伴碟有奇異果、士多啤梨、西瓜、涼粉，淋花奶同糖漿，又甜又解熱，好爽快！記住呀，刨冰每天9:00pm後供應，夾啱時間呀。
c.老地方（26080840）
地址：大圍上徑口村102號
海藻果凍粉扮涼粉
「永富甜品屋」過百款甜品，我唯獨看上撈河粉。所謂河粉，其實係用海藻果凍粉製成，切至條狀，賣相晶瑩通透，唔講咁多整番碗鮮果撈河粉（$18），爽滑多汁悶熱一掃而空。老闆娘話：「有人甚至淨食粉唔要鮮果，因為食得多對皮膚好喎。」
b.永富甜品屋（26936663）
地址：大圍上徑口村52號A2舖
大條青瓜冰一冰
行過「大有麵館」，未入門口我已被「冰鎮」二字吸引，立刻入去睇吓有乜嘢可以冰一冰先？哦，原來係冰鎮青瓜配溏心皮蛋（$15）！老闆娘嚴選大條鮮青瓜，橫切都可以有一大片，旁邊放置溏心皮蛋，一啖清爽青瓜一啖滑溜皮蛋，真係心都涼晒。
a.大有麵館（26063388）
地址：大圍上徑口村15號
