招積域：喂，踢狼隊嗰個南韓國腳前鋒薛咩咩轉會去雷丁喎，原來佢都值100萬鎊！
菠蘿文：你連人哋名都唔識，佢叫薛琦鉉呀，但點諗都唔覺得佢值100萬鎊。侍仔，你又點睇呀，你女友識唔識佢？
侍仔：我女友話覺得薛琦鉉名大於實，見佢以前踢狼隊都唔係突出嗰隻，入波唔多，踢國家隊都係後備居多。或者踢過世界盃身價高些少，你打FM都係啦，2打6踢過世盃，身價都會不合情理地上漲。
招積域：希望雷丁入啱貨啦，佢哋唔多錢，又話要加門票價錢維皮，如果入流嘢就……
侍仔：想睇低組別聯賽好困難，得一間收費台有得播，仲要只係播大戰，想睇其他隊都只係可以喺足總盃度睇一場半場。
招積域：最多咪睇網上面消息當軍情，未見過佢哋踢，又點知球員表現係點？
菠蘿文：有好嘢唔睇睇次貨？4大聯賽都睇唔晒啦，做咩事要睇低水平賽事呢？為自己賭錢定係多時間得滯？我就唔會花時間鑽研次等聯賽喇。
買好後衞難度高
侍仔：打機打慣咗，鍾意喺次等聯賽睇下有咩正貨。好似富咸就喺英甲升班馬奧連特簽咗個中堅，見各方對佢評價不俗，如果唔係都唔會掟100萬鎊落去買。
招積域：嘩！咁咪仲冒險過雷丁？100萬鎊買英甲球員。
侍仔：呢個就唔知道啦，買前鋒都話可以睇佢入球數字，呢個你同我都識睇；但判斷後衞值唔值買，就難度高好多啦。
招積域：低組別賽事咁難先睇到，又點樣賭呢？為博冷而扒冷，唔值。
文：高洛文
(本欄逢周一至周五刊出)