葉劉牽頭組織智庫，傳聞話有阿爺撐腰，唔知真唔真，但人人估會角逐連任嘅煲呔都唔執輸，噚晚去友好協進會嘅慶回歸晚會，難得見到大班有選委會選票嘅友好，梗係要拉吓票。主持飯局嘅友好協進會主席李東海話，回歸九年來香港都「驚濤駭浪」，好彩有煲呔強政勵治，講到煲呔係救世主咁，認真擦鞋！
咁煲呔亦不忘擦阿爺鞋，佢讚揚友好協進會夠「愛國愛港」，又話香港回歸咗九年，經歷唔少挑戰，如果唔係中央皇恩大赦，搞咗大堆措施，香港經濟都唔會復蘇得咁快，仲話體會到中央阿爺嘅深切關懷。另外，煲呔又翻炒香港水嘅伎倆，借世界盃嘅合作性，勉勵香港人要有團隊精神，橋就係舊咗些少，但此話莫非另有玄機，想借踢波嚟奉勸前隊友陳太同葉太要同佢團結合作，唔好同佢爭？不過，見煲呔近日喺銷售稅單嘢放料畀部份傳媒，擺明大玩「親疏有別」，自己都未做好榜樣，仲點叫人團結？