人生最緊要自由，但唔係個個國家都可以畀你想點就點；歐洲其中一個較自由嘅地方西班牙，佢哋畀同性戀者合法結婚，𠵱家連國內班霸巴塞隆拿都為同志出口氣，搞咗個同志球迷會。
據報，巴塞隆拿開創西甲史上先河，搞間同志球迷會嘅目的，係希望球場上嘅觀眾對待同性戀者，會同對待一般人無異，唔好帶住啲騎呢歧視眼光睇佢哋，佢哋並唔係怪物！巴塞為咗吸納社會上更多唔同階層嘅球迷，即將喺未來幾個月成立同志球迷會，畀機會啲男女同志成為佢哋嘅支持者之餘，又可以畀同志機會，喺球迷會內識到更多志同道合嘅朋友仔。
由於國內另一支勁旅皇家馬德里陷入低谷，而球星如雲嘅巴塞來季走勢備受睇好，加上呢個西班牙第1個同志會，相信喺未來幾年，無論巴塞成績得唔得，佢哋嘅球迷人數都只會有增無減，財源繼續滾滾而來。
關心弱勢社群
巴塞現正積極開發亞洲市場，非洲就早早有佢哋嘅分支㖭，如果佢哋繼續向弱勢社群埋手嘅話，分分鐘遲啲會有埋「黃業」球迷會、「癮君子」球迷會、「農夫」球迷會之類，各適其適，應有盡有，對球壇應該係好事嘅。
其實，同志會喺歐洲唔係新奇事，德國早就出現咗，好似多蒙特、史特加同哈化柏林已經有同志球迷組織，為呢班弱勢社群伸出希望之手！喺世界盃期間，德國人為咗證明佢哋充滿包容性，同志球迷更加自發性組織咗球迷會，用行動嚟支持國家隊。
求驗客話
雖然歐美國家非常開放，但係同志仍然係社會上備受歧視嘅弱勢社群，巴塞(左圖左)咁做係值得大讚嘅，睇波人人有份嘛！