正所謂「十指痛歸心」，即使成人亦難以抵受。有兩歲幼童早前被門縫「夾爆指甲」，整塊指甲幾乎甩掉，急症室醫生在沒有用麻醉藥下，硬把指甲「塞返」入手指兩邊嘅指縫，令幼童痛楚狂喊，惹來父母不滿。
讀者劉女士，說起孻仔阿灝的受傷經過，仍猶有餘悸。她說：「2號個晚，我行轉背入房，擺番啲衫入櫃，就聽見兩歲嘅阿灝慘叫一聲，我即刻衝出廳睇吓乜事，見佢揸住隻左手係咁喊，食指就不斷流血，睇真啲先見係塊指甲就甩！」
原來，阿灝在哥哥關門時，不知危險，竟把小手放到門縫處，導致指甲遭狠狠「夾爆」。劉女士續說：「當時我唔敢掂阿灝塊指甲，怕佢受唔住，只好揸實佢手指關節嚟止血，然後帶阿灝趕去伊利沙伯醫院度睇急症！」
硬將指甲塞入傷口
豈料，急症室醫生的治理手法和態度，卻惹來劉女士極大不滿。她說：「排咗一輪隊，等到阿灝隻手指都冇再流血，先有醫生睇。我問醫生使唔使將阿灝塊就甩嘅指甲剪走，嗰位男醫生就話，剪咗反而生唔番啲指甲，然後就叫個護士捉住阿灝隻手，佢就夾硬將塊指甲「塞返」入阿灝兩邊嘅指縫，痛到阿灝喊到收唔到聲。」
只是阿灝的痛苦，尚未終結。劉女士說：「之後帶灝灝照X光同洗傷口，護士發現隻指甲仲有一邊未「塞」好，於是通知醫生插多次。當灝灝爸爸啱啱趕到嚟，醫生見阿灝掙扎得犀利，叫埋我哋兩個幫手捉實，爸爸就㩒住灝灝膊頭，我就抱住灝灝個肚。」
目睹愛兒痛極狂號，阿灝父親亦淚難禁。劉女士說：「灝灝嗌到聲都失埋，我都唔敢睇住醫生搞塊指甲！但見到灝灝阿爸，眼濕濕咁睇住個仔，整咗五六分鐘都仲未得，就忍唔住問，點解唔麻醉先做，不過個醫生就好唔耐煩咁話『打咗麻醉針，佢都一樣咁郁㗎啦！』，講完就繼續整灝灝隻手指，唔肯理我哋。」
父堅持始打麻醉針
阿灝父親再三堅持，醫生始肯為阿灝進行麻醉。劉女士說：「嗰位醫生，見阿灝爸爸態度強硬，先肯叫護士攞支麻醉針，喺阿灝隻食指兩邊拮咗兩吓，跟住阿灝好快就靜咗落嚟，唔再掙扎，畀醫生處理佢個傷口。」
事後，劉女士質疑醫生為何不在開始時使用麻醉藥。她說：「我梗係信醫生決定，雖然見個仔痛得咁辛苦，開頭都唔識可以用麻醉。後尾阿灝爸爸要求，睇住打完麻醉針，阿灝即刻冇咁痛，好安靜咁接受治理。咁點解唔一開始就幫阿灝麻醉止痛？如果第一次就已經移正塊指甲，就唔使個小朋友受多次苦。」
就阿灝的個案，本報曾向伊利沙伯醫院查詢：醫生何以不及早和主動使用麻醉藥？而此一決定，是否影響首次之治療效果，致傷者需進行第二次治療，承受更大之痛苦？類似傷勢，又會否有其他較少痛楚之治療方法？直至截稿時，院方仍未作回覆。
檔案編號：0705032
