祥益地產繼早前得到僱員再培訓局嘅「僱主金星獎」，同埋香港社會服務聯會嘅「商界展關懷獎項」後；老闆娘汪陳葉菁啱啱又入選第五屆中國企業創新人物表彰大會嘅「中國企業創新優秀人物」。
先解釋吓呢個表彰大會先，係由中國市場學會同埋中國企業報社聯合舉辦，直接推選出100位嚟自全國，包括香港在內嘅企業精英，由國家領導人喺北京人民大會堂親自頒獎，表揚佢哋提倡自由創新企業嘅努力。
點為之自由創新呢？祥益老闆汪敦敬話過去3年，佢哋以培訓班形式，向數百位無工作經驗嘅年輕人同埋再培訓人士，傳授地產代理行業知識；而正式錄用過嘅亦有百幾人，佔佢哋員工人數約六成。
呢個實踐「社會企業」嘅概念，就係佢哋攞獎嘅主要原因嘞，而一向主內政，包括培訓、請人……嘅汪太，就成為得獎者。同場攞獎嘅，仲有名人小賭王何猷龍、咖啡專家王冠樺。