呢兩日天氣又熱又翳悶，着幾少布出街搵食都成身𣲷黐黐，去商場歎住冷氣搵食咩？唉，差不多全部都係集團式經營嘅連鎖店食肆，食嚟食去嗰幾味，好無癮。唔係嘞，博一博，我今日決定付出汗水，唔歎免費冷氣，趁去大圍顯徑街搵食，好彩行啱路搵啱舖，一條顯徑街N咁多消暑凍食，簡直透心涼呀。記者：黃若茵 攝影：何家良、伍慶泉
常轉Menu有新口味
望勻成條街，日式料理店只此一家，有11年揸鑊鏟經驗嘅湯師傅話：「以前喺紅磡開舖，客源好廣，𠵱家呢？做嘅多數都係屋村客，要經常轉Menu先留得住呢班屋村客，好彩𠵱家生意都叫OK，都Keep到唔少屯門、大埔、香港仔外來熟客。」呢個世界無好彩呢回事，食物質素高自然留得住熟客，而今日介紹嘅冷麵，雖然唔係乜嘢創新料理，但一到夏天就非常好賣，湯師傅話：「食冷麵最緊要係個汁，冷烏冬必配冷麵汁，其他配搭會影響質感，蕎麥麵夠幼細，就可以創新啲配沙律醬。」
日式冷麵
竹筒綠茶麵$37
竹筒裝住綠茶麵，賣相靚絕，附一碟Wasabi同埋鵪鶉蛋，可自行將鵪鶉蛋攪勻倒入竹筒內撈麵食。我建議落多啲Wasabi，綠茶麵有齊冰涼同辛辣口感，好鬼正。
特色冷麵$60
師傅拍晒心口話第二度無得食：「蕎麥麵撈沙律醬我創嘅，沙律醬自己調配，咪睇沙律醬好似好膩咁，凍食冷麵就可以平衡番，令蝦肉更鮮美。」
冷麵沙律$45
名為冷麵沙律反而無用沙律醬，將蛋絲、紫菜絲、蟹柳、青瓜撈埋一齊，淋正宗日本沙律油，酸酸哋好醒神。
食客有Say
鄧先生：「成日落嚟幫襯，就腳嘛，最鍾意食呢個竹筒綠茶冷麵，夏天食好正。」
搵食攻略
d.河合居（26013150）
地址：大圍下徑口村154號地下
營業時間：
11:30am-1:00am
交通：大圍火車站轉乘803K綠色小巴，惠顧滿$100免費泊車2小時
座位：40個
人均消費：$60-$80
最好賣：魚生冷烏冬
有大牌檔氣氛
顯徑街成條街都係3層高小屋，地面一層全部係食肆，行去街尾，見一間潮州舖內外坐滿食客，甚有大牌檔氣氛，牆上仲貼滿報紙雜誌嘅鱔稿，我遞上卡片同職員搭嗲：「咦？你哋呢度都OK旺喎。」職員隨即賣花讚花香：「係呀，好多名人幫襯㗎，無綫高層、xx闊太、xx大明星……」佢愈吹得大我愈有戒心，咪嘞，粗粗哋點碟凍蟹試試，之後再隊多條賣相一般但全店熱賣嘅鹽焗元朗烏頭，之後又試凍龍蝦，再之後試埋滷味，愈試愈多全因天時熱喫凍食透心涼，最重要係食物水準高。
潮州冷盤
凍蟹3隻$100
老闆：「做凍蟹一定要用呢種深水紅蟹，因為嚟自深海，無泥味，煮嗰陣唔使額外加料辟除泥腥味，即係最原汁原味。」咬開蟹箝，成條大蟹柳即時彈出，肉厚鮮甜，3隻$100幾抵食。
潮州鹽焗龍蝦$100
3年前老闆靠呢道凍食打入「食神爭霸戰」總決賽，選用肉嫩海南島花龍或青龍，點普寧豆醬係最正宗潮州食法。
鹽焗元朗烏頭$55
𠵱家全港只剩番幾個魚池提供元朗烏頭，老闆話：「我特登揀呢種多黃油嘅烏頭，用粗鹽醃過後再蒸至剛剛熟上碟。」輕輕𠝹開魚皮即有大量黃油滲出，異常香口，怕肥都要食。
滷水鵝$45
滷水汁講到明用貴價材料秘製，唔試對唔住自己。一試，滷水汁的確味道濃郁，涼浸浸鵝肉好嫩口，老闆：「我只會揀貴價鵝，成本雖然貴啲，但肉質特別好。」
正宗「架己冷」
食飽，咬住牙籤，到一身街坊裝束嘅老闆劉先生同我搭訕。老闆汕頭出生，好自豪自己係地道潮州人：「𠵱家係人都話識整潮州菜，以為加啲汁呀，整啲滷水咁呀就係潮州菜，根本就係一知半解。其實唔同食物都要配唔同嘅醬汁，潮州菜好着重原汁原味，凍食嘅海鮮就特別食得出鮮味。」佢老竇嗰代已經開始做打冷，店中師傅一做幾十年，朝見口晚見面，大家好似一家人：「師傅做海鮮冷盤會用粗鹽，因為粗鹽先會慢慢溶解，過程中有助發揮海鮮鮮味。我哋啲滷味都好出名㗎，滷水汁用好貴嘅料特別調配，用乜嘢料？嘩，秘方嚟㗎嘛，講咗出嚟俾人抄襲點算呀？」
食客有Say
搵食攻略
e.生昌潮州海鮮酒家
（26872998）
地址：大圍下徑口村151號地下
營業時間：5:00pm-1:00am
交通：大圍火車站轉乘803K綠色小巴，惠顧滿$200有2小時免費泊車
座位：室內及露天座位200個
人均消費：$100
最好賣：鹽焗元朗烏頭，日賣至少50條
