煲呔發命令司局長要落區了解民情後，「阿瑟王」李國章同「平叔」王永平噚日都有行動。阿瑟王就去咗深水埗，先去友好嘅中中德貞女子中學，同十幾名嚟自唔同學校嘅學生以及家長同老師茶敍。教統局話出席者同局長反映，局方嘅扶貧措施對家境困難嘅學生好有幫助。
之後佢又去到海麗邨，喺花園仔同啲細路仔玩，成個「老頑童」咁，話覺得自己年輕咗唔少；佢仲學俄國總統普京抱起個小朋友，只係冇學佢錫人哋個肚仔。佢噚日仲有去長沙灣政府合署學生資助辦事處同西九龍中心「梁蘇記」買傘。噚日咁熱，阿瑟王冇淨係留喺有冷氣嘅地方，都算係交足功課。
平叔噚日都有落大埔打個轉，仲全副武裝參觀咗一間食品製作公司，之後去幫襯咗一碗雲吞麵同一碗龜苓膏醫肚。平叔仲特別打包咗碗龜苓膏走人，睇怕都係畀老婆歎，真係錫老婆喇。