妙人鄧永鏘前晚去咗銅鑼灣捧雕塑大師朱銘場，問佢有乜新搞作，佢就話繼85年之後，下個月會出第二本書，仲搵咗「肥彭」彭定康幫佢本書寫序，到時出書「肥彭」仲會嚟香港幫佢造勢㖭。八方問佢會唔會學啲明星搞吓簽名會？佢話︰「唔會啦，冇人排隊好醜嘅，我又唔係為大眾文化、平民出書，銷量幾多都冇所謂，我又唔係靠佢開飯。」前晚有電視台同鄧永鏘做訪問講佢出書呢件事，佢一對住咪就話係《蘋果日報》幫佢出嘅，對方叫佢唔好講報館名，鄧就話︰「唔得，咁係《蘋果日報》幫我出㗎嘛。」拉扯一輪後，終於話︰「咁講生果啦，日日都要食嘅。」
另外，全球第二有錢嘅畢菲特早前宣布捐出374億美元做慈善，鄧永鏘就話︰「真係想介紹個精神醫生畀佢睇，捐十分之一出嚟都嫌多啦，如果我要捐副身家，75%會做慈善，10%畀老婆同妾侍，10%畀仔女，5%就捐畀lover，即係真係講愛嗰種，不過我唔急做呢樣嘢，因為我未想死住。」