大家作為《金手指》fan屎，都知道我有個朋友叫做何洱緣，佢雖然年紀大我少少，不過對時代最尖端脈搏嘅掌握就好我好多。上一排世界盃，就係佢教我點樣用ppstream.com免費睇波。噚日，佢嚟辦公室探我，胳肋底夾住份我哋特區非常之暢銷嘅西報，話要我睇一篇新聞報道，等我睇完之後，會有關貨幣政策嘅問題要問我。
我第一個反應就係諗話呢篇新聞，究竟係講伯南克、任志剛、定係日本中央銀行結束零利率政策。不過我都覺得怪，何洱緣係一個連買股票要開戶口，都唔知道嘅人，點解會無端端問我關於貨幣政策嘅嘢。我就喺呢一種奇怪感覺驅使下，第一時間睇嗰篇新聞報道。
原來嗰篇報道係講一個叫做KyleMacDonald嘅加拿大頹廢青年（youngbum），佢舊年呢個時間，有一日食完飯等緊排泄，對住部電腦上網嘅時候又再一次被阿媽鬧「頹廢」。佢就求其喺電腦桌上拾起一隻萬字夾，用好輕佻、包頂頸、駁嘴駁舌嘅態度咁同佢阿媽講：「我就用呢隻萬字夾，一年之內換間屋番來！」睇到呢度，我就諗，呢啲空頭支票，咁多年嚟我都向孫柏文偉大嘅阿媽開過唔少。例如，我都曾經同阿媽講過我要做到特區「十大港產石油股分析員之一」，不過就連我都覺得呢位加拿大青年都幾攞膽。
何洱緣又一驚愕問題
點知，原來新聞紙都講呢位頹廢青年嘅原因，就係因為佢真係得咗，成功用萬字夾換間屋。佢上網，用「以物易物」方法（英文繙譯Barter，亦即係搵啲有佢要嘅嘢，又同時間要佢啲嘢嘅人做交易），搵人交易咗14次，由初頭用萬字夾換一支筆，再用筆換個手造門柄。直至最後，佢用一次出鏡荷李活電影嘅機會，換咗間喺加拿大某小鎮嘅屋番嚟。
睇完之後，我都覺得非常驕傲，因為佢幫我哋呢班頹廢青年出咗啖氣。跟住我問何洱緣：「點啊，我睇完啦，你有乜關於貨幣政策嘅嘢想問？」何洱緣就話：「孫柏文，你成日講到貨幣咁重要，你睇吓，呢條友做14次交易，都冇用過貨幣，你話貨幣仲有乜用？」
佢問完我之後，我即刻愕一愕然，愕然程度直迫佢上一次問我：「乜買股票都要有戶口嘅咩？」我冷靜落嚟之後，就開始解釋貨幣嘅用途，其中一個用途，就係要解決兩個人想做交易嘅時候，必須要阿甲要阿乙有嘅嘢，同時間阿甲又要有阿乙要嘅嘢呢個情況（番鬼佬經濟學家叫呢個現象做doublecoincidenceofwants）。
十億網民配對又何難
不過我都要承認，喺「舊經濟」年代，「阿甲」真係好難搵到「阿乙」。不過今時今日，有互聯網嘅世界，一個「阿甲」打開電腦，就有過十億嘅網民，分分鐘就係「阿甲」要搵嘅「阿乙」。
最後，如果真係個個都以物易物，冇錢銀交易，一個極權政府都好難抽「商品及服務」稅。到時候，呢個極權政府只可以更加粗暴干預、監視每一個市民做嘅交易，呢個就係曾蔭權特首想將香港變成嘅世界。到時候，我將來嘅女朋友如果話，我幫佢揼骨，佢就錫我一啖，都會有稅局嘅職員踢門抽稅。如果呢個情況出現，亦因冇金錢交易，我惟有提供「服務」畀個稅局職員當交稅，到時我會出盡力咁去「揼」佢。
後記：其實我話要做「十大港產石油股分析員之一」，我都成日同人講我係成功嘅，特別係入行嗰一刻。點解？因為唔同銀行、地產股有好多港產分析員，當時只有九個港產石油股分析員囉！
孫柏文