今年樓市表現失色，連累地產代理都冇啖好食，利嘉閣就趁上半年啱啱過去，喺月會上做吓回顧同展望，仲將全年生意額目標，由年頭嘅8億大幅下調近三成至5.7億，即係同舊年差唔多。估計其他同行都會作出修正；聽講大老闆施永青仲開到口，叫班夥計要面對現實，做好本份。
而利嘉閣執行董事廖偉強就定咗下半年嘅目標，係持盈保泰，鞏固同強化公司規模，望能以強陣出擊，爭番多啲生意同盈利。除咗會做好二手，仲會加強一手部署，因為下半年會有成萬個一手新盤推出市場。
舊年樓市勁好景，代理行幾乎個個月都話賺到笑，個心自然好雄啦，所以對今年嘅生意額目標定得好高，利記舊年生意額係5.6億，今年目標就定到8億，聽講當時施生已經覺得過高，結果真係俾佢講中，要調低番個預測㖭。不過，若果做得番舊年條數，其實都已經好唔錯㗎嘞。
做番舊年條數算唔錯
由於今年上半年4大代理行都係「你睇我好．我睇你好」格局，下半年大家都諗住搶攻，爭客戰肯定異常慘烈，最擔心係市場冇咁多買家，到時有盤都係冇得埋欄。
電郵地址：[email protected]