八年前與丈夫離婚的馬女士，獨力照顧三名子女，擔子不輕。最近她家中已用了近十年的電器開始老化，她盼望可獲贈新電器，改善生活。
指着已截斷電源的熱水爐，馬女士一臉無奈地說，「呢部熱水爐都用咗成十年，早排撻唔着，用唔到，搵過師傅上嚟睇，話啲電線已經霉晒，好危險，叫我唔好再用。」付了一百元檢查費，電熱水爐卻未能修妥，馬女士大歎無力支付一千多元購買新熱水爐。她慶幸現時天氣炎熱，暫時無需用上電熱水爐洗澡。
一家四口綜援維生
馬女士說，幼子升讀中二，兩名女兒最近剛找到售貨員工作，不過工作屬時薪制，收入不太穩定，「佢哋都係夠自己搵、自己食，好難叫佢哋攞錢出嚟幫手。」她一家四口現靠領取綜援金生活，實難以一筆過拿錢購買新熱水爐。馬女士續說，「有諗過供機，不過要用信用卡找數，我哋冇收入，好難申請到信用卡。」
另外，她家中的電視機亦用上近十年，按鈕已壞，「要用支筆頂住個掣先開到，我都驚有危險。」還有，由友人送贈的電飯煲亦出問題，「呢個飯煲好嘥米，成日黐底，煲三嘜米，就有一嘜米黐底。」
由於子女漸長大，她希望重投社會工作，現時已報讀再培訓課程，打算從事保安或家務助理等工種。
蘋果日報慈善基金了解過馬女士的經濟困境，正安排撥款二千元助其購買電熱水爐。而她希望可獲善長捐贈電飯煲及電視機。捐款編號：C1136