世界盃啱啱完咗冇耐，睇番足智彩未來開盤嘅賽程表，都有巴甲、瑞超同圖圖盃畀球迷攝時間過吓手癮。不過波友切忌落重注喺呢啲冇乜盤路捉嘅賽事入面，事關嚟緊嘅8月中下旬，就會有德甲同英超開鑼，𠵱家當滿足吓鋪賭癮算數。
嚟緊禮拜六，足智彩開咗7場圖圖盃受注，睇番外國幾間大莊，有好多場波都冇開盤，好似維拉利爾對馬里博爾、同埋歐塞爾對化奴呢啲咁強弱懸殊嘅對壘，如果莊家開盤隨時輸鑊甘。不過，紐卡素對利尼史特朗呢場圖圖盃，就有好多海外博彩公司開晒盤，似乎有啲陷阱盤感覺。
紐記鬧前鋒荒咪掂
足智彩呢場波開「讓球主客和」，名牌嘅紐卡素讓1球，紐記現時陣中大鬧「前鋒荒」，先有舒利亞退休，奧雲又因韌帶受傷要07年先可以復出，小將祖柏又已轉會至英冠嘅卡廸夫城，𠵱家紐卡素只係剩番艾美奧比1個係正前鋒，點讓嗰邊踢咗成4個月挪超嘅利尼史特朗1球？
足智彩今場開紐卡素單W都係得1.35倍，比起幾間海外大莊冷些少，似乎已洞悉到紐記前線不足嘅特點；今場「和局」同「客勝」都有逾3倍分頭，買兩瓣戥勻佢都有微利落袋。文：畢傑