近期有關財務策劃師嘅新聞都唔少，繼銀行公會推出新嘅財務策劃師課程，財務策劃師學會亦話10月會舉辦第三屆財經博覽06。
博覽會以財富創造、財富累積、財富分布及財富保障為主題，工作小組主席龐寶林希望透過博覽會提供第一手有關投資、理財教育嘅資料畀大眾，估計今年會有超過3萬人參觀。佢仲以身作則，特別請多成百個大專生做場地助理，希望佢哋可以邊做邊學。
博覽會已經搵到五大參展贊助商，包括恒泰贊助嘅遺產管理展區；財華社贊助投資關係展區；理柏贊助基金管理名人堂；宏利同滙豐贊助投資天地。龐寶林就有個理財榕樹頭環節，會邀請名人嘉賓，「窩輪皇后」李頌慈就係其中之一，實行用名人效應同埋大機構做賣點！參展商同嘉賓都幾吸引，如果有興趣，不妨去學吓理財知識，點都好過將啲錢入晒紅簿仔收得嗰少少息！