港股噚日受美中兩地股市上下（上晝同下晝）夾攻，恒指一跌就唔見200多點，險守16300大關。
話口未完，港股嘅調整要捱多一兩日，但噚日一日已唔見216點，亦已經落到下跌目標16300水平，趁低入貨嘅最佳機會已出現。
周三美股跌百多點，周四內地股市跌幅更超過4%，本應調整的港股借勢急挫，好正常，而且仲跌突，反映唔少人睇淡周四美國個市。不過，有人睇淡，亦有人睇好；噚日下晝，已經見有唔少基金盤入市吸納，目標係幾隻大藍籌，包括滙控（005）、中移動（941）、長實（001）同和黃（013）。大市整固完成後，恒指將會向16800推進，焦點亦會係在呢幾隻大藍籌身上，特別係噚日刻意造低嘅滙控，更值得留意。
今年5月，滙控曾升上142元，現時在137元水平上車，安全性已有提高。近兩個月來，滙控走勢形成一個大圓底，家陣在頂部整固，只要升破早日嘅高位139.50元，中期升浪即可確認，初步上升目標係147元。
預測PE僅11.8倍
滙控將於月底派中期成績表，今年首季，集團所有客戶群業績都比去年為佳，市場看好滙控中期業績，預計盈利會有10%以上增長，而股價在宣布前後相信亦會有好表現。
05年（12月年結），滙控盈利1173億元，升17%；每股盈利10.61元，升15%，全年派息5.66元，升11%。06年，預測盈利1320億元，升12%，每股盈利11.55元，預測PE僅11.8倍。
9成大行看好滙控前景，瑞信最樂觀，目標價168元；睇滙控見150元以上嘅大行有麥格理、荷銀、摩根大通、BNP百富勤同中銀等。
瑞信指滙控盈利展望佳，估值十分吸引，預測PE較其他多元化金融機構呈折讓，維持「跑贏大市」評級，168元目標價有22.8%上升空間。
大市再起升浪，滙控必然係火車頭，短線投機要買輪，可揀4497，噚日收0.50元，有效槓桿率16.8倍，溢價1.5%，仲有個多月玩，滙控升1元，隻輪可升7仙，可睇定嚟食。
郭兆誠