組合at17成員盧凱彤（Ellen）今年書展會推出相集《失．逃》，集合了她四年來的心血，以圖片及簡短文字表達內心所想，當中亮相最多的，除了好拍檔林二汶，還有她的愛貓蘇菲。
盧凱彤近年愛上攝影，不論風景或人物，盡成其鏡頭下的獵物。這四年來她拍下大量照片，決定在今年書展推出名為《失．逃》的相集。
拍照發洩
Ellen表示出書最大困難是精選最具代表性的相片，她說：「我每次去旅行，至少會影七筒菲林，屋企又冇燈箱，所以揀相就要逐條底片放喺光管下面照。」接着要將大堆相片編排次序，她說：「今次排相我係分開幾part，構思都係源於一個音樂會流程，即係第一part通常會唱啲好開心嘅歌，之後就會唱抒情歌，跟住就係sad少少嘅，最後再唱番啲開心嘅歌，今次排相都係依住呢個方向去排。」
Ellen表示不開心時便會拍照發洩，因她認為日後重溫相片，便會想起當日情景，她續說：「有好多事一瞬間會過去，但我影低佢，之後睇相就可以諗番件事。」今次相集曝光率最高的分別是林二汶和Ellen的愛貓蘇菲，她說：「因為二汶同蘇菲係我嘅最愛。」
採訪：李珮洳 攝影：林德雄
服裝提供：Bauhaus 髮型：DerricNgofChin.G
場地提供：PumpernickelofArtCentre
圖片提供：Ellen
