近年經濟好景，唔少行業搵到錢自然諗吓擴充，若果租到一大層寫字樓，好用之餘又夠晒氣派，所以上半年逾萬呎嘅全層寫字樓租務成交有成75宗，涉及樓面125.16萬方呎、租金2990萬。
中原地產研究部高級經理黃良昇話，灣仔區最多呢類成交，佔咗13宗，樓面共20.1萬方呎，兩者都係各區之冠。不過以租金計，就始終都係中環區最勁，雖然只得9宗共13.6萬方呎樓面，但涉及月租700萬，平均每呎51.5蚊。
最旺商廈原來係太子始創中心，有成7宗逾萬呎全層租務成交，包括12至18樓，面積共14.6萬方呎，月租共320.4萬元，睇嚟大業主九龍建業肯定最開心。
黃良昇話中環租貴，搞到好多租客走咗去太子、銅鑼灣同北角呢啲外圍地區，好似北角區咁，就有12宗逾萬呎全層租務成交，月租成204.8萬，樓面共15.1萬方呎，計落平均每呎只係13.6蚊。