招積域：侍仔，你個仇人獲續約喎，你點樣睇呀？
侍仔：我唔會再講呢個冇膽鬼杜明尼治！佢唔配做男人！
菠蘿文：咁畀杯熱奶茶我先啦，侍仔。
招積域：呢單嘢都預咗會講一段日子，你咪又日日係度嬲，何必呢？不如睇吓轉會市場仲好啦，是非都係少講啲好。
肥牛：喂，廸甘斯做咗祖記教練喎，佢係咪儍㗎？上一隻極有機會沉嘅船到，係都搵間穩陣啲㗎。
祖記照搵教練有啓示
侍仔：但聽佢講，話要為球隊帶來更多熱誠，好似以前佢做球員咁樣。祖記若無其事咁搵新教練，會唔會暗示球會唔使降落丙組呢？
招積域：你同我都唔想祖記星散，但係打假波就要罰啦，話之佢係咪對球壇大有貢獻，係香港先會有「挽留降班」咁荒謬事情。
肥牛：香港好特別㗎，霍生成日都掛喺口邊㗎啦，話香港係「特殊環境」，希望國際奧委會考慮……
菠蘿文：特殊嘅嘢，權威人士話嘅啫，祖記降落乙組我都唔會接受！打咁多年假波，厚顏無恥。但點解冇球員被起訴呢？真係冇球員參與咩？
招積域：肅貪倡廉呢樣嘢，當然唔會牽連太廣啦。嗰陣廉署都set咗時限，話界線前嘅就「既往不究」，我諗係有球員參與，但實在太多，所以先揀大粒佬呢「整」。
中村英壽：好難想像派路、保方佢哋有打假波……如果係咁，中田當年都可能有……
侍仔：中村生，退咗休嘅球員就唔好多想啦。前美國女飛人咪又係俾人懷疑佢食禁藥，但冇人考證到啫，所以中田都應該唔會有人追問啦。但做衰嘢有天收，成世都唔會安樂。
高洛文