大家今日打開我哋特區各大報紙，係咁講有史以來都係各國執政黨「英雄塚」嘅銷售稅。點解孫柏文會話呢個稅係執政黨「英雄塚」呢？遠嘅唔講，淨係講番九十年代，加拿大嘅GST（GoodsandServicesTax商品及服務稅）呢個例子都會令到聽者傷心、聞者流淚。
當時執政嘅進步保守黨，又係好似我哋特區幾年前嘅政府一樣，話加拿大有嚴重財政赤字，所以要收多一項稅。仲話要全國人民都知道政府使嘅錢，最終都係「羊毛出自羊身上」，所以每次人民買嘢嘅時候，面對嘅價錢，都未包括GST稅款，要去到畀錢嗰陣先至會知道要畀幾多稅。務求令到每個人民都深深感受到交稅嘅痛苦，達到「你哋班唔交稅嘅窮人，仲夠膽要求政府洗咁多錢」嘅效果。
究竟加拿大有銷售稅之後，佢哋嘅人民係唔係忽然有咗「想幫政府慳住咁使錢」嘅心態，就留待他朝慢慢為大家再分析。不過我可以好負責任地同大家講，有咗銷售稅之後，每個人民都明白交稅嘅痛苦，求其「識透氣」嘅都要畀。亦因為加拿大係民主社會，人民嘅痛苦、不滿可以用普選機制發洩，執政嘅進步保守黨，為「國家長遠財政穩健」嘅高尚目標，犧牲自己，喺下一屆選舉，由151個國會席位去到剩番2個。最後仲要執笠收場。
今時今日，都有好多政客，都好支持呢個「識透氣」稅，大家睇佢哋好似「親政府」政客，不過其實係「終極無間道」先至真，大家諗吓，我哋特區一旦有呢個稅，曾蔭權特首一定成為過街老鼠，最後患病被迫「升職」。
窮人交稅會要更多福利
不過，最唔小心露咗「倒曾」馬腳嘅，就一定係我覺得平時都非常有道理嘅兩會議員陳智思，佢就係最鍾意用「你哋班窮人都要交稅嘅時候，仲會夠膽要求政府使咁多錢」嘅理由去推銷銷售稅。我相信要達到陳智思議員嘅「窮人都知自己交緊稅」目標，我哋特區嘅銷售稅，就一定要好似加拿大一樣，咁乞人憎。估唔到原來陳智思議員係一個不折不扣，反對曾蔭權爵士嘅「長毛式」民主鬥士！
最後，我想用我隻金手指，為陳智思議員篤一本書畀佢睇，本書個名係《Freakonomics》（冇錯！就係嗰本話因花旗國70年代畀人墮胎，所以少咗啲「唔應該」生嘅BB，最後令到花旗國90年代犯罪率大幅下調）。本書裏面亦有講關於一群家長嘅研究，呢群家長全都幫襯開一間託兒服務，託兒服務當然最希望啲家長準時湊仔，每次啲家長遲到，託兒服務職員都會黑口黑面。咁就憑呢個壓力，希望家長唔遲到湊仔。後來託兒服務開始收取罰款，遲到要罰錢，希望可以減少遲到，點知仲弄巧反拙，家長因為罰咗錢，所以完全冇晒俾人話係「無賴」嘅壓力，所以遲到嘅家長人數反而增加。最後託兒服務「投降」，將罰款取消，希望重返原本面貌，不過因為家長已經冇晒做「無賴」嘅壓力，所以雖然家長罰款冇咗，不過照樣遲到。希望陳智思議員自己去睇睇！
孫柏文