印度發生炸彈襲擊事件，金價昨日在亞洲市升穿640美元，倉內的紫金礦業（2899）開市初段曾升上4.45元高位，趙飛雲貪心諗住睇高些少，在4.50元才食糊，點知事與願違，紫金愈回愈多，最後以4.25元收市，僅升0.075元。不過，睇圖金價短期未升完，見650美元機會相當大，希望冇睇錯，紫金稍後可以在4.50元以上食糊。
至於倉內另一隻股份太古A（019），昨日初段升上79.80元後掉頭向下，跌至79.50元終於忍不住沽出，以免利潤繼續被蠶食。其實早前太A升至81.40元受阻以雙頂回落，早就應該先食糊，但見股價在80元守得住暫不予理會，但跌穿80元的容忍界線就無法不沽，雖然太A預期跌到78元就會有支持，不過一旦估錯便白造一場，寧願現時先獲利，候78元補回好過。
昨日提過「荔枝熟炒滙控C輪」，主要是滙控（005）多數在7月尾或8月初公布中期業績，大行估滙控業績通常唔會離譜，如果業績預期靚就會有買盤跟進，股價表現向好。
今年情況亦唔例外，滙控6月尾跌至132.50元見底回升，周一升至139.50元先作整固，昨日收138.40元，微跌0.10元。可候滙控股價稍回至138元左右，便可收集C輪短炒。
收集4882或4877
滙控C輪最多人玩的是4497，但稍嫌價內（行使價133.88元）及街貨太多（高達83.94%），而且引伸波幅18.9%亦較同期C輪為高。左秤右秤還是覺得4882較佳，詳情可參考同文方德正兄的Warrants戰機，此外4877成交雖較疏，但數據亦佳，勝在發行商售後服務佳。
趙飛雲