陳奕迅（Eason）老婆徐濠縈近期多次偕男伴夜蒲，昨日凌晨拇指受創的Eason未獲嬌妻陪伴，獨自踢拖到便利店，狂掃大堆叮叮點心，又殺上老友謝霆鋒band房，跟對方夜敍開餐訴心曲。
陳奕迅和太太徐濠縈的關係向來奇特，近期Eason嫂多次被拍得偕不同男伴四出夜蒲的照片，節目多多，但Eason昨日凌晨三時卻一支公往中環蒲「7仔」，買下一堆叮叮點心做消夜，又約老友謝霆鋒夜敍談心。
搵霆鋒解悶
當時頭髮蓬鬆、留鬚渣的Eason，踢拖、孭背囊和帶着一部手提電腦，坐的士到中環雲咸街7-eleven便利店，見他的左手拇指受傷，要用紗布包紮，但無礙消夜雅興，還揀了數盒叮叮燒賣、魚蛋和蝦餃。問Eason為何手指公受傷，他笑說：「之前踢波囉，我做龍門，俾個波打埋嚟篤親隻手指。」
接着Eason咬着膠叉，將食物放入微波爐叮熱，然後狂加豉油和辣椒油，他笑言並非不戒口，只是買外賣給朋友享用，其間又問記者為何聚集蘭桂坊，當知道古巨基正在附近拍MV時，竟抵死地說：「唔好出我張相大過古巨基，唔係佢實嬲呀。」之後Eason挽着外賣往霆鋒的band房，邊行邊發揮長氣本色，咿咿哦哦地說：「唔好影我行去霆鋒band房啦，我行去前面咋，上去敍舊啫，冇乜嘢嘅，係咁㗎啦，你明㗎啦。」
採訪、攝影：娛樂突發組
