夏日炎炎，每日好似火燒咁嘅陽光，出街都會盡量以清爽涼快嘅打扮為主。要涼快，永遠都令人想起竹蓆，而出街當然令人想起夏日專用嘅藤籃啦！早10年8年，藤籃係阿媽去街市買餸嘅好拍檔，不過呢個想法過時又老套；因為𠵱家好多女孩子分分鐘仲同阿媽爭籃用，襯夏天衫夠晒清爽涼快。2人1袋輪住用，淨係用一個夏天都夠晒化算啦！
記者：許維雅
攝影：黃子偉、陳陶鈞、林栢鈞
Model：Crystal@Salvador
Makeup：Meegan@MaeVon
Natalie
邊度買：葵芳商場
幾多錢：唔係好記得，好平，幾十蚊，總之$100以內。
Leanne
邊度買：菲律賓
幾多錢：其實係朋友送畀我嘅菲律賓手信。
Christy
邊度買：借朋友用，唔知。
幾多錢：因為係朋友嘅袋，都唔知買咗幾多錢。
Ceci
邊度買：銅鑼灣時代廣場
幾多錢：$99
Elsa
邊度買：去越南旅行時買。
幾多錢：$20左右
藤籃年年必in
藤籃已經成為每年夏季嘅大熱袋款，雖然款式年年差不多，但亦好少會有Out嘅感覺，阿媽用又得、阿女襯衫又掂喎，經濟實用。不過各位靚女睇啱就最好即刻科水，因為好多細舖入嘅藤籃都係1個起2個止，由泰國、越南入貨嘅都係簡單、原始的設計，而由日本入貨嘅會較多顏色同花臣裝飾，感覺較潮但就容易過時。
購買地點
a.agnesb（25766784）銅鑼灣柏寧酒店StyleHouse101-102號舖
b.K2（28081407）銅鑼灣柏寧酒店StyleHouse1樓107-8號舖
c.Oxygen（29237376）銅鑼灣時代廣場515-516號舖
d.2068（29447886）銅鑼灣金百利商場UG836A舖
e.JA:2K（28817148）銅鑼灣地帶1樓102號舖
f.Purpura（34283718）銅鑼灣地帶2樓257號舖
去東南亞執平袋
其實有去過越南、柬埔寨、菲律賓、印尼等地旅行嘅人都知道，呢類東南亞地方必掃手信就係藤籃。由於這些落後國家嘅人工較平，所以好多時十元八塊已經買到一個質素不錯嘅藤籃，有朋友去開不妨搭單買番個。筆者亦曾經去過越南旅行，賣碗碗碟碟嘅舖頭直情係用藤籃載住畀客人，而唔係用膠袋，真係膠仲值錢過藤，而且夠晒環保！當然藤籃嘅好處係韌力夠，幾重嘅碗碟都唔會有爛袋嘅情況出現。一分錢一分貨，當地藤籃款式簡簡單單，極其量袋面釘上當地嘅特色珠片，潮就一定冇份，想誇的話就買返香港自己DIY啦！
實用Bible：打理藤籃5大法
不少人怕買藤籃嘅原因都係因為怕打理麻煩，好多時都會發霉起迹，用唔夠幾次就勾到啲藤起晒，袋仔壽命時間極短。諮詢各大店員意見，得出以下5大保養方法：
1.清水洗刷
出街會整污糟個袋有時避無可避，尤其係出入餐廳食店搞到一笪二笪，唔心痛都有鬼。要清理藤籃只可以用濕布以清水輕輕抹拭污迹，記緊切勿大力，否則容易勾起藤絲。
2.曬吓吹吓
香港天氣潮濕，藤籃好多時會遇濕發霉，袋面漚出好多霉點有礙觀瞻。所以Sale姐姐建議不妨多啲攞個袋出嚟吹吓保持乾爽，更不妨喺有太陽時攞出嚟曬一、兩小時，但最好避免曬得太久而令藤籃變色。
3.加防潮珠
一般存放手袋都好難搵到通爽嘅地方，大部份人都會放入櫃桶，但櫃桶空氣唔流通，往往係最潮濕嘅地方。為免提心吊膽，最好放2粒防潮珠落藤籃，延長藤籃嘅發霉時間。
4.入膠袋放櫃
每次用完個袋放入防潮珠之後，入櫃前謹記用膠袋笠住並打結。因為好多時櫃桶內嘅袋放在一起，容易被其他袋扣勾起藤絲，加膠套可減低藤絲折斷機會。
5.用防水噴霧
市面上好少清潔劑係畀藤籃專用，為咗避免有污迹問題出現，Sale姐姐建議用一啲防水噴霧離遠噴一噴。雖然唔可以完全避免污迹產生，但用清水清理時都會較為容易，一般售賣地毯或布藝梳化嘅地方都會有得賣。