世界盃踢完，餐廳羅若有所失，因為全年做酒吧嘅黃金時期已過，二○一○年南非世界盃實在太遙遠。問佢生意如何，是否好過二○○二年？餐廳羅諗咗一陣，心算一番，然後話：「今年生意比上一屆世界盃好咗三成，如果英巴打到入四強，生意會更好；不過○二年嗰陣，經濟冇𠵱家咁好，市民消費重係就住就住，今年就開懷暢飲，故此消費多咗。」
生意好，有冇後遺症，驚住一節淡三墟呢？餐廳羅話：「大戰過後，梗係趨於平淡嘅，每年暑假生意都唔好得到去邊度㗎啦，最大嘅後遺症可能係好多行家都俾酒吧樓上或者附近居民投訴噪音，唔知政府會唔會秋後算賬！」今年因世界盃球賽多在晚上十一點舉行，球迷聲浪難以控制，餐廳羅搏命叫啲人客唔好咁嘈，根本冇人睬佢。德國對意大利嗰次，意大利喺加時最後一分鐘射入一球，酒吧呼聲震天，連最熟睡嘅人都會驚醒。左丁山一位家居赤柱嘅鬼佬朋友就係咁，嚇到幾乎跌落地，醒咗之後，打開窗望落街，先至醒起世界盃球賽正在舉行，於是一笑置之，再瞓過，但好多香港人就冇咁容忍度高咯，一味打電話去警署投訴。聽過警察有時派人到酒吧地段巡視，但係凡有大批球迷結集，警察都費事叫酒吧熄電視啦，想撩起酒客鬧事咩。香港警察好識得臨場執生，唔會主動搞起事端嘅。
問餐廳羅，邊間酒吧最可以開懷大嗌，唔怕俾人投訴，唔怕警察到場？餐廳羅話：「呢，商場內嘅酒吧就冇人投訴嘞，譬如《蘋果日報》喺星期日（七月九日）頭版講嗰間中環Grappas，呢間意大利餐廳/酒吧位於怡和大廈地牢，附近十幾條街冇一個住宅，所有鍾意睇打波嘅鬼佬都喺晒度，氣氛熱鬧到極，兩年後踢歐洲盃，嗰度一定係歐洲人大本營。」餐廳羅唔睇好二○一○南非辦世界盃，因為南非治安不靖，匪徒如麻，最近又發生一單台灣商人滅門慘劇，根本同德國差天共地。俾南非主辦世界盃，純粹係FIFA嘅政治正確底下嘅政治決定，好可能係害咗世界盃。