有日行過大埔，見到間裝修唔錯嘅意大利餐廳，本住記者精神咪上去趁吓囉，問大廚兼老闆Andy有乜好介紹，點知佢竟然同我講：「我最正係打車輪……」吓？雖然我索啫，都唔使咁直接嘛？聽真啲，原來佢話：「……最正係煮車輪粉。」我無失望，皆因熱辣辣車輪粉確實超好味，唔只我咁講㗎，連Krusty都抵受唔住車輪誘惑：「好味到彈起呀。」
記者：黃若茵
攝影：伍慶泉
Jan：車輪？我要試呀！
帶Krusty入「Oliva」，櫈都未坐暖，我即刻攞住碟未煮熟嘅車輪粉問佢哋：「知唔知呢隻粉叫乜嘢名？」Jan一臉儍氣：「個樣似檸檬喎，係咪叫檸檬粉呀？」阿嵐仲爆笑：「圓碌碌咁幾得意吖，我估佢叫圓碌碌粉。」錯晒！大廚Andy開估：「香港有賣呢種車輪粉嘅餐廳不出5間。」「來貨咪好貴？」「又唔係喎，車輪粉喺意大利好普通㗎咋，不過香港人較少認識，所以無乜餐廳會賣咁解啫。」唔係貴嘢唔緊要，物以罕為貴就得喇，Krusty講出我心聲：「點都要試吓喇！」除車輪粉，餐廳仲有款同樣香港罕見嘅彈弓粉，不過單睇個Look勁似普通螺絲粉，Andy解釋：「彈弓粉同螺絲粉做法完全唔同，做彈弓粉，要將大嚿粉糰推向一支圓柱，然後……」其實我聽極唔明，不過食好嘢使乜理咁多吖，好味咪得囉。
阿嵐：點解有咁多種形狀嘅意粉？
試食期間，阿嵐問咗個聽落無聊但其實我都好想問嘅問題：「做咁多種唔同形狀嘅意粉出嚟，會唔會無謂咗啲？」Andy笑答：「唔無謂，每種形狀都有作用㗎，例如車輪粉，中間有好多窿夾住大量醬汁，食起上嚟咪特別多汁濃味囉，又例如蜆殼粉，佢外形似個碗仔，可以裝到好多湯或者汁，個汁校稀啲都無問題，至於彈弓粉，做成咁嘅形狀係希望入口可以更加煙韌……」正因為Andy堅信已將味道口感最夾嘅意粉同醬汁配埋一齊，所以客人提出自選意粉拼主菜，佢一概拒絕。
睇餐牌，有好多選擇，豬牛雞魚甚至素食都有，Andy經常轉餐單，客人一定唔會悶，佢仲話：「入行11年，最開心係可以教曉客人食意大利菜，以前客人會問點解啲飯唔熟，因為意大利飯係食半熟嘅；又或者問點解麵包無跟牛油，因為意大利人食麵包係點醋㗎，我歡迎客人每事問噃，你愈多嘢問，我愈開心。」
南瓜雞肉芝士忌廉汁車輪粉$68
睇清楚，醬汁黐晒喺車輪中間嘅窿窿，𢳂幾粒放入口，唔……香濃芝士忌廉汁即時喺口中爆發，雞肉亦極為鬆軟，跟軟身車輪粉簡直係絕配。
芝士青雜菜彈弓粉$56
Andy：「素食變化較少，惟有喺醬汁同顏色上搞新意思，今次專登揀牛油果、西蘭花呢類綠色雜菜配蘆笋，同煙韌嘅彈弓粉燴埋一齊，個賣相咪靚啲囉。」
燴牛膝$158
Andy：「呢道菜係我今屆廚神大賽嘅參選作品，我對呢道菜好有信心，番茄、甘笋呢類蔬菜係最天然嘅鬆肉粉，拌牛膝用慢火煮4粒鐘，肉質自然變腍兼入味。」
烤魷魚荔枝配菠蘿沙沙$56
沙沙指未經烹煮嘅生果蔬菜醬汁，一般多數用番茄做主調，Andy：「今次創新啲，用菠蘿代替，配埋有咬口嘅新鮮魷魚同荔枝，整道前菜清新開胃。」
香草醬鮮蝦意大利飯$78
Andy悉心調製香草醬，用羅勒、意大利香荽同本地香荽3種主要香料，加入松子仁、欖油等混成，香草味濃郁但不至霸道，欖油亦令飯粒更滑嫩，口感極佳。
意式雞肉腸拼海鮮雜錦Pizza$168
Size有2呎乘1呎大，還可自選兩款口味雙拼。今次揀意式雞肉腸同海鮮雜錦，相當足料，一格Pizza至少有5隻蝦，抵食過專食Pizza嘅連鎖店多多聲。
食客唔知車輪粉係乜！
意大利粉喺邊度嚟？
先講種類，意粉粗略估計至少有300種，細分3大類：一，意大利長麵（PastaLunga），即所有長過4吋嘅麵條如Spaghetti、AngelHair、Fettucine；二，意大利短麵（PastaCorta），即不同形狀或短身麵條如PenneRigate、Spirale等；三，有餡意粉（PastaRipiena），如最為人熟悉嘅意大利雲吞。至於起源就眾說紛紜，有人話係1292年由馬可孛羅從中國經絲綢之路傳入意大利，不過亦有歷史學家發現喺馬可孛羅之前嘅1,600年，羅馬人已經曉得製造意粉，當時嘅意粉名稱叫Macaroni而非Pasta，Macaroni係西西里語，意指「大力做嘅生麵糰」，同意大利粉做法極為相似。我就相信後者說法，你又信唔信？
搵食攻略
Oliva（26650663）
地址：大埔安慈路1號海寶花園第10舖地下
營業時間：11:00am-11:00pm
交通：大埔火車站乘坐K12接駁巴士，於8號花園下車過馬路便可到達
座位：130人，設卡座及吸煙區
人均消費：$150-$300
最好賣：燴牛膝，每日賣40多份