今日講乜？
施丹？一句係「佛都有火」，另一句係「小不忍則亂大謀」，佢就係例子。有乜教訓？教吓細路仔，「頂頭槌」係頂個波而唔係頂人心口；教吓球隊心戰室，一定要羅列晒對手最忌嘅嘢，用把口搞亂人哋對腳。例如施丹驚蜘蛛，你就喺佢身邊猛咁講：「有蜘蛛呀！」咁去嚇佢。相反嚟講你個隊友怕蛇，平時就要猛咁同佢講：「有蛇呀！」。
佢係真性情，大家可以原諒。
我哋個特首呢？不可原諒。話自己冇講過「親疏有別」咁都得？咁玩文字遊戲真係當我哋係白癡。係唔係見陳太同葉劉叫陣就兵荒馬亂？
如果特首踢世界盃，mark佢嗰位記住係咁喺佢耳仔講：「陳太！葉劉！」佢一定射唔入，重會頂你心口。
我哋有球證，不過唔會有紅牌。
個球證重會吹雞話：「等個波循序漸進，咪嘈！」
所以特首冇乜好講。
都係話番畢菲特。又講佢？唔係，係由佢引申出嚟嘅。我都好想你哋有人將來好似佢咁捐好多錢畀香港，所以介紹大家睇一本書，作者係巴哈（DavidBach）書名係《TheAutomaticMillionaire》呢本書就係教你點樣自自動動咁成為百萬富翁。呢本書喺美國好賣得，作者上過晒電視，乜嘢Oprah、CNN、ABC、NBC等大台都請佢講嘢。
本書寫得好淺白，作者自己都講有好多嘢其實係老生常談，不過冇人肯做咁解啫。例如佢話記得買屋。呢點係人都知，但係佢話供樓唔好逐個月供而係半個月供一期，佢重計埋數解畀你知點解有着數。又例如佢叫大家清咗信用卡啲數唔好袋信用卡出街等等。
細節等大家自己睇，不過佢講嘅係美國情況，點套用喺香港就你自己做工夫。
有一樣嘢我好有印象，就係佢話Learntopayyourselffirst，即係出糧畀自己先。
老細出糧當然係入自己袋，咁乜嘢叫做出糧畀自己？我哋好多打工仔唔知嘅係一出糧我哋就先畀錢人哋（供樓、車會、學費等等）而最後先至到自己使。巴哈話睇情況，可能係1%到20%，總之一定要留一啲錢，而且要同銀行講好自動入一個戶口。佢話你冇得使嘅錢你唔會使。總之細節你閣下自己睇。
最緊要睇最後嗰章。
捐錢！你愈捐得多，收入就愈多。
佢舉個例（唔係畢菲特），有個SirJohnTempleton，好窮嘅時候已經決定每月捐錢，最後一樣成為千萬富翁。
李公子，你玩財技好嘢。
點解唔捐一半出嚟畀文化藝術?!
咁至叫做英雄！
觀火