世界盃7月10日凌晨結束，不足24小時，無綫收費電視7月11日晚即大鑼大鼓宣布旗下的《娛樂新聞台》啟播，與有線電視正式埋身肉搏，要大家重新考慮：世盃後你仍需要「K寶」（Cable）嗎？
今時今日，我們有4個收費電視台選擇：有線、無綫收費電視（下稱「TVBP」）、now寬頻、香港寬頻，你會點裝？
記者：廖秀娟攝影：廖秀娟、周旭文
收費電視邊間好？
文化人組 中產唔受
a何國良
「對我嚟講，收費電視只係令時間觀念有所改變，Cable有24小時新聞，TVBP係一大堆舊劇集。對中產嘅好處唔多，呢班人喺網上嘅世界遠比喺電視中得到的多，呢批觀眾又不足以支持一個收費電視台做些小眾趣味；我曾替有線兒童台做顧問，但收視似乎都唔理想，𠵱家只做《我們都是父母》俾家長睇，即係又係一般觀眾，無擴大觀眾層。收費電視只喺文娛、合家歡節目多咗選擇，質素好咗？未算。」
b李照興
「香港的收費電視新嘢唔多，《志雲飯局》？算咩新嘢？TVBP更加係一個圖書館的作用。香港地方太細，好難做到分眾，台灣的收費電視，有啲地區街坊節目，可以係台南一個小地方的聯歡晚宴；美國的收費電視，更加可以以天文budget拍《Lost》。而且我哋嘅生活形態改變咗，唔會坐喺屋企等睇電視，中產直情自己有辦法睇外國嘢，根本係電視留唔住呢班人，唔完全係收費電視內容的問題。」
c梁文道
「收費電視係有提升我嘅口味，好似Discovery。不過香港電子傳媒冇膽試新嘢，係通病，文化節目一聽就覺得係悶，其實好多外國文化節目做得好有趣，好似德國的『Arte』台，做一個關於『手』的節目，搵10個導演拍不同版本，有泰國傳統舞蹈員優美的手部動作；有京劇演員的做手；畫家作畫手勢，不知幾好睇，香港人莫講話拍，買片都唔敢啦，變成收費電視買嘅嘢差唔多，大家互搶觀眾，好難共存。」
大專生組 裝有線
dKitty
「我屋企全日都係睇收費電視，我同阿哥睇Cable世界盃、娛樂台，媽咪睇TVBP的經典台。𠵱家都係覺得有線好啲，主播靚啲，TVBP冇個得！香港寬頻啲戲舊到死，其他台亦完全唔得！」
eAlexWong
「主要睇體育台、Discovery同新聞台。我唔覺得對我嘅娛樂資訊生活有改善，有線播嚟播去都仲係《九品芝麻官》、《龍在天涯》，好cheap；世界盃、新聞可以喺網上睇，唔裝都得㗎！」
fVictor
「cut咗Cable半年，其實節目都幾ok，不過佢對舊客好衰，唔cut台唔肯減月費；反正世界盃上網會睇到，無綫新聞都時時有摘要睇，唔睇佢都得。」
OL組 撐收費電視
gSallyLai
「因為Cable有基督台所以裝，第二啲電視台搵唔到。其餘我會睇新聞、Discovery。收費電視係有改善生活，我哋𠵱家咪爭電視睇囉，冇佢唔係幾得呀！」
hSammie
「有線睇咗4、5年，主要睇娛樂新聞台、電影同新聞台，幾好睇，每日睇佢多過無綫。now係用寬頻送嘅，財經台普通啲，要錢就唔會用落去。」
i陳太
「因為老公要睇波，所以裝，總之一日英超喺邊，我哋就會裝嗰個台。我自己都會睇吓新聞、娛樂新聞台，對生活娛樂係有改善嘅。」
金融財經組 24小時昅實
j陳永陸
「24小時不停run的財經資訊台，對金融界好重要，即使一般投資者，都好有用。Cable每半小時更新一次，又有專業分析員分析，我覺得係暫時做得最好嘅財經台。」
kLeo
「屋企人要裝，我就覺得冇乜用，嘥錢！新聞、財經，邊度都睇到，NationalGeographic之嘛，國際台一早有啦，劇集台，全部都係舊戲，買碟都得，其實冇乜需要裝收費電視。」
l李先生
「主要睇新聞、體育、Discovery同財經。都需要有收費電視嘅，隨時可以睇到嘛，𠵱家睇佢嘅時間同免費電視一樣。」
邊個台最啱我？
1.我愛24小時即時新聞 揀有線
4台皆有自己的新聞採訪隊，縱觀有線新聞台最出色。林超榮說：「可能有線做24小時新聞經驗多，佢哋返嚟嘅片都多啲。幾次大新聞佢哋都做得出色，好似最近嘅青藏鐵路，就明顯比TVBP豐富。」
2.我愛電影 揀now
愛電影的人，4個台都不對胃口，因全是舊片，特別香港寬頻，本月推介鬼片，竟然是《陰陽路》？確實得人驚！惟獨now有全線HBO，有自己的大製作，如《雷霆傘兵》，湯漢斯、史匹堡監製，唔失禮！
3.我愛足球 揀now+有線
最強的外國體育頻道ESPN，已轉投now手上，意甲、德甲、法甲都在此，但若你是英超擁躉，留意下屆英超在有線，選有線還是now，會傷腦筋。
4.我愛港產娛樂 揀TVBP
娛樂新聞台有最強本地明星陣容，而且是說廣東話，其他台無可比擬。TVBP的劇集台亦是只此一家，仲連泰國劇都有。
5.我要孩子開心揀now
參考街訪余小姐的意見，有6個兒童頻道的now暫勝一籌；林超榮亦說：「我個女都好鍾意睇DisneyChannel的卡通。」但論益智兒童節目，TVBP與有線有益智製作，香港寬頻亦有補習頻道。
6.我愛AV女優 揀有線
以「靚女永無嫌多」的理論，10個鹹台的有線確比分別6或4個鹹台的香港寬頻、now或TVBP好。可惜全部無自己製作，以前的《勝在夠開心》真係冇市場咩？
7.我愛外語世界揀有線
4台同時有法、德語頻道，有線和now（TVBP）尚有日、印度台，有線和香港寬頻亦有菲律賓台；有線更有韓國、西班牙、葡萄牙語頻道，特別是香港多菲律賓人，很能兼顧小眾社群。
超人推介：免費都有好嘢
林超榮本是電視精一名，他覺得香港收費電視很難做得好，特別TVBP出現，會迫令有線做更多迎合大眾的節目。與其花錢裝收費電視，不如善用錄影機，「國際台買齊3輯《CSI》，睇埋佢哋《國家地理雜誌》、《60分鐘雜誌》每日已經學識唔少歷史。」其他推介有：
《名作背後》
逢星期日 1:45pm-2:40pm 明珠台
每集剖析一幅世界級名畫，請來不同地方的博物館專業人員、大學歷史或美術系教授、切合該畫題材的專業人士，從不同角度欣賞名畫。
《大衛牙擦騷》
星期二至六11:20pm-12:10am
星期日1:00am-1:50am國際台
美國名嘴DavidLetterman一星期六晚專訪荷李活名人。好像去年羅素高爾在酒店用電話「鑿」職員個頭，被捕後未上庭，已經上節目向公眾認錯；羅素一出場，David即時收起茶几上的電話，幽默抵死。
《亞洲強人》
7月13日開始逢星期四
8:00pm-9:00pm 國際台
國際知名雕塑家朱銘剛來港，掀起他的雕塑熱，原來國際台新一輯《亞洲強人》，第一集便是介紹朱銘的奮鬥歲月。其他強人還有Acer創辦人施振榮、陳沖、成龍。
畀錢前要知
1.小心重複頻道
now寬頻是無綫收費電視TVBP的發放平台，TVBP真正全新推出的頻道只有8個，其餘皆與now共用；常見外購頻道如Discovery、NationalGeographic等，大部份都是其他收費電視同時擁有，買2個或以上不同電視平台時，要留意是否買了重複頻道。
2.專攻夠慳家
now的頻道可逐一購買，有線的套餐亦有不同選擇，如果你沒時間看幾十個頻道或興趣只側重某一兩項，可以買適合自己的平價有線套餐，再加一兩個喜歡的now頻道，便最慳月費。
大清算
總頻道數目達101個的有線，多過now的97個台，比香港寬頻的54個（未計24個文字資料頻道）及TVBP共46台，更多出成倍。再講，始終老大哥較全面，街訪中的文化人及陸叔等知名人士都撐Cable。當然，TVBP的劇集台有獨特吸引力。最唔掂係香港寬頻，台少、電影out兼無自己製作。