立法會開埋今日就暫時收檔唞暑，回顧呢個會期議員真係好鬼忙，連記者都疲於奔命，自由黨幾個主將，包括田北俊、周梁淑怡同林健鋒難得體貼，噚日買咗一大堆馬仔、鳳梨酥、芒果酥、草餅同棉花糖等各式各樣零食，喺立法會慰勞記者，搞到記者室忽然甜氣沖天。
莎姐周太話，自己好鍾意食糖㗎，可惜……！點解欲言又止？佢指指自己個肚話：我無乜位喇嘛﹗大家明解啦。
田少派嘢食之餘仲大講波經。佢剛睇完世界盃返嚟，心情勁靚，向記者派糖之後，又主動咁拎咗一袋戰利品畀記者影相，見到佢攞咗兩套babysize嘅帽、鞋仔同小型足球出嚟，八方仲以為係裝飾品，但田少話係送畀佢十個月大嘅孫仔。田少話巴西一輸波，原本值二十蚊歐元嘅鞋仔即時劈價一半，好抵咁話。唔好見田少平日coolcool哋，一講到乖孫，佢即刻笑晒咁，又大讚戰利品夠cute，成個廿四孝爺爺咁款！不過，唔知佢係咪太愛孫仔，田少竟然唔記得屋企個太座。佢話返香港時，老婆即刻問：「你買咗咩畀我？」田少先醒起自己唔記得咗，真係失禮！