除咗5日工作，同埋二少賣仔之外，呢排中環熱到爆嘅話題，仲有着唔着西裝，打唔打呔返工！自從呢個禮拜一煲呔喺立法會答問大會度下旨，公務員可以casualwear返工之後，跟政府跟得好貼，兼且分分鐘超前嘅滙豐，噚日就出咗份內部文件，修訂員工衣着守則，反應快成咁，都咪話唔厲害！
呢份內部文件，係由滙豐執董王冬勝發出，適用於所有唔使着制服嘅員工。咁即係話，大家以後會多啲機會，見到一眾平日官仔骨骨，執到正一正嘅銀行高層，好似鄭海泉、邵銘高、王冬勝、工商部一姐梁高美懿等，着得鬼咁輕鬆喺公司行嚟行去喇！
滙豐話，今次修訂唔係為咗煲呔，反而係回應間行嘅員工，大家傾咗一輪，先至有咁嘅決定咋！簡單啲講，滙豐將員工嘅返工衫，分做三大類：一係商務服飾，要見客嘅就一定着呢款；二係商務便服，唔使見人或者做後勤就可以揀呢款；三係辦公室便服，辦公時間過後就可以咁着。
指引附溫馨提示
之不過，畀員工着得輕鬆啲，唔代表准你着得隨便。話晒咁大間行，要講形象，兼且始終係返工，所以沙灘裝、晚禮服、運動BraTop、超短熱褲、睡衣，甚至啲露指拖鞋，大家真係諗過度過先至好着！為免員工有乜唔明，或者拗餐懵，個指引下面仲有溫馨提示，寫咗啲乜……就係「請緊記：如不肯定，最適宜穿着商務服飾。」
李華華
讀者如有任何意見或報料，歡迎發送電郵至[email protected]。