八方噚日喺立法會見到進出口界議員黃定光，當堂嚇咗一跳，因為佢變咗單眼光！右眼蓋住紗布，仲戴住一副茶色眼鏡，唔通出咗咩意外？原來佢喺星期日世界盃決賽前一個鐘頭喺屋企跣親，當時個頭先着地，所以整爆咗副眼鏡，玻璃直插右眼，真係非常驚險，要即刻入醫院。
好彩事後佢吉人天相，醫生話淨係傷到眼球，神經線同視網膜都冇事，遲吓會好番，所以唔使變盲俠。但黃定光話，𠵱家隻眼仍然好腫，睇嘢有兩個影，仲淨係睇到紅、白、藍三色。問佢係咪趕住睇波出事，佢就話係家居意外，因為起身矇查查，企唔穩先會跌倒，同睇波冇關。八方聽聞紅蘿蔔同藍莓對視力有幫助，黃定光不妨試吓喎！