曼聯嘅南韓中場朴智星為咗保飯碗真係咩都講得出，呢排傳基斯坦奴朗拿度唔肯返曼聯要轉會走人，朴智星就嗱嗱臨喺度認親認戚博搶正選位，佢竟然公開話領隊費格遜係佢嘅「教父」，好似老竇咁教佢成長喎，使唔使擦鞋擦得咁盡先？
朴智星係醒目仔真係醒目仔，睇見C朗個勢都唔慌會留隊，即刻彈單咁嘅嘢出嚟，費Sir個心唔冧晒都唔得啦，朴智星就咁講：「費格遜教識咗我好多嘢，佢教我點樣踢波會出色啲，教我做人要點樣先有進步，十足成個老竇咁款。」知啦，我求大俠知你擦鞋仔喇。
指進攻型戰術啱晒佢
朴智星仲提到，費格遜戰術講求進攻型，好啱佢嘅踢波風格，唔似得燕豪芬同南韓國家隊嘅舊教頭軒廸克咁，鍾意打防守陣式。嘩，你唔係反轉豬肚就係「咩」呀？不過球迷可以放心，朴智星好識講嘢嘅，佢都不忘讚番舊老細：「基本上軒廸克都似我嘅『教父』，佢係介乎老竇同哥哥之間嘅角色，都係教我踢波同人生道理咁。」
朴智星認真係一條兩頭蛇，講咩都唔會得罪新舊老細，仲好得佢哋歡心㖭。但係朴智星喺今次事件入面，原來都有講錯嘢嘅時候，佢竟然話：「有一樣可以肯定嘅係，費格遜唔可以做我哥哥，只能夠做我老竇，原因係佢嘅年紀問題。」如果我求大俠係費Sir嘅話，真係唔知好嬲定好笑，淨係知呢位一向好記仇嘅教頭，肯定唔會忘記呢番說話。星仔，執生啦！
求驗客話
朴智星今次趁「C朗事件」抽水博上位係人之常情，但係又認晒「仔仔」咁好似有違韓國男人威風嘅特性喎。計我求大俠話，用實力證明可以打正選就最好，起碼隊友會服你，唔會踩你係擦鞋仔先啦！