創富生物科技（340）復牌，高收0.68元，大升63.8%，有成3.7億股嘅大成交支持，唔係亁升。
股市中好多寶藏，尋得到，固然好。今年以來，以倍計升幅嘅股票，其實有唔少，除創富外（冇改錯名，噚日一日就創造財富6億元），聯康生物科技（690）（又係「生物科技」）嘅升幅仲勁。
先講創富，今次大升，主要係公司轉型做「礦」，以前有過唔少例子，公司一做「礦」，股價就大幅飆升，創富亦唔例外。創富進軍礦業，收購嘅金紅石礦，係提煉幾「矜貴」嘅鈦之原材料，唔怪之得市場反應會咁熱烈。
仲有，創富啱啱做完「披成」，10億股每股0.40元，集資唔夠4億元，主要用作收購。配售價較停牌前收市價0.415元僅有輕微折讓，但聽聞貨源唔單止冇出街，而且接貨嘅位位都係大有來頭嘅人物，亦可以解釋點解復牌後股價會大升。
開始熱身要昅實
市場有消息，話創富呢一轉好有機會見到1字頭，但升咗咁多，要睇定。今年4、5月期間，創富股價仲係0.20元，家吓已大升240%，在情在理，都應該要調整一下，亦即所謂「震倉」，等調整後再上車未遲，若果見番5毫幾，上望1字頭，預期升幅都幾可觀。不過，上車後見唔對路，要識跳車；若啱key，就上移止賺位，一路持有，賺到盡。
再講聯康，今年3月時，股價仲係0.50元，今個月初，升到上2.95元，升咗4.9倍，家吓在高位整固。睇走勢，已有人嚐咗甜頭，但消息就話只係熱緊身，仍要昅實。
聯康前身係新高準，轉型後進軍藥業，聽聞幕後人好有把炮，已經計劃好晒日後嘅「大搞作」，一步步嚟，做藥嘅生意，可大可小，一隻藥成功咗，就會豬籠入水。
聯康早輪供完股，家吓發行股數5.4億股，但好重要一點，就係貨源絕大部份在強者手中（睇成交就一清二楚），成隻股票嘅「可塑性」極之強，日後一有大動作，股價不難騰飛。
聯康𠵱家整固，趁低吸係方法，但好難摸到底，亦可以趁其破位時追進，炒一轉。又要講嗰句，要識跳車，又要識賺到盡。
郭兆誠