苦候多時，繼《超人特攻隊》終於輪到《反斗車王》登場，彼思動畫愈做愈勁，CG像真生鬼之餘，亦不像廸士尼自家動畫咁沉重說教味，大人細路樂於捧場！電影聽日在港上畫，唔只廣告起勢播，同期更有7大遊戲版本登場，務求係打機嘅都接觸到，將電影氣勢推上高峯！
記者︰陸俊雄
家用版玩影音效果
電影遊戲，最重要係將電影入面吸引人嘅元素，帶到入遊戲度。如果純以賽車Game去睇，《反斗車王》唔算出色，不過以電影遊戲嚟睇，無論係PC、PS2或XBOX版，佢都表現到每部車嘅性格，有鬼馬表情，又有真人配音，稱得上係高水準嘅作品。
講到咁正到底玩咩？家用版主要包括Story、Arcade兩種模式。Story入面主要係玩家用主角「麥坤」，喺一個叫「RadiatorSprings」嘅小鎮四處遊蕩。玩家要同其他車對話，觸發事件緊接鬥車。仲有學飄移、過路障、玩MiniGame儲分，用嚟參加「PistonCup」大賽。你不斷去贏，目的要出晒所有隱藏車同賽道。喺Arcade模式入面，你就可以隨意玩番呢啲隱藏戰利品。
PC版：加插電影片段
玩法上，PC版同其餘兩個家用版分別不大，但畫面解像度上，佢係最好嘅一個。車嘅面部表情，加速時令後面部車食塵嘅畫面，同電影一樣出色。贏比賽後，玩家仲有機會睇到電影片段，或幫車改改顏色。可惜PC版只係1人遊戲，贏到精采片段，改車改到幾靚都好，都唔可以同人分享，平白浪費PCOnline嘅特色。筆者覺得係最美中不足嘅地方。
PS2版金曲邊玩邊播
PS2版最令人玩得投入嘅地方，係有好多喺電影裏面出現過嘅好歌聽。例如《FreeRide》、《RockThisTown》，仲有好多經典金曲邊玩邊播。另外，啲車講嘢時，會有真人發聲，全部來自幫卡通配音嘅演員如保羅紐曼。令人玩起嚟，覺得每架車都有唔同性格，係一般賽車遊戲冇嘅地方。
XBOX版：飛天過車最High
玩開其他賽車Game嘅朋友，都批評《反斗車王》太易玩，至於XBOX版喺操控上，更係最易上手、最流暢嘅一個版本。其實易玩未必唔好，要睇隻Game對象係邊個。家長同小朋友一齊玩時，易玩易贏咪仲開心！特別係賽道設計咗好多跳板位，衝上天後玩滑翔咁飄落嚟，筆者覺得幾過癮吖！仲有俾警車追、又撞極唔減速，大細路都玩得興奮。
手提版故事大減
手提版係指PSP同NDS版，同家用版最唔同嘅地方，係故事枝節減少咗；即係Story模式入面，冇電影情節可言，玩家亦唔會起勢遊蕩唔知下一步做咩好，故事Guide住你發展。好多車晨早有得你揀，唔使用死「麥坤」，用吓女主角「保時捷」、拖頭「哨牙嘜」都得。
PSP版：4人對戰勁剌激
PSP版分Story同GrandPrix兩個模式，有15架車畀你揀，每架車喺性能上都有少許分別。Story基本上同電影故事無關，所以少咗好多真人發聲對話，亦唔會有MiniGames出現。至於GrandPrix，主要係鬥車為主，最吸引係可以4人透過Ad-hoc對打，唔鍾意齋同電腦玩嘅人最啱。
NDS版：迷你遊戲夠多
NDS版一開波有3個MiniGames畀你玩，打後係要玩家參加「PistonCup」大賽，每贏一次就送多3個隱藏MiniGames，共4次大賽，即12個細遊戲。當中有個釣魚最鬼過癮，另外跳火圈都好玩。此外，每架車都有自己嘅故事發展，而且全部係3D畫面，有用掣玩又有TouchScreen玩，NDS嘅電影遊戲嚟講，佢算最好玩。
PROFILE
遊戲類型：賽車
對應機種：PC/PS2/XBOX/GC/PSP/NDS/GBA
遊玩人數：1至2人
開發廠商︰THQ
美版售價︰PC版：約$170/PS2、XBOX、GC、PSP版：約$320/NDS、GBA版：約$240