港股昨日回吐早就預咗，雖然恒指跌超過110點好似唔少，但其實以16490收市，守在5日線（現處16452）之上，技術上仍十分強勢。
睇番近期帶動大市上升的滙控（005），昨日雖回吐0.80元或0.57%，但仍企在保歷加通道頂及5日線（現處137.50元）之上收市，報138.50元，技術上仍屬偏強。
麥格理睇滙控155元
滙控將於7月31日公布中期業績，麥格理昨率先出報告唱好，話滙控旗下的企業、投資銀行及資本市場（CIBM）業務在第2季表現良好，帶動集團整體盈利上升，加上滙控PE12倍、P/B2倍並未反映盈利增長潛力，故給予「優於大市」評級，目標價定155元。
假如稍後其他大行亦發表類似看好報告，滙控股價有望反覆上升，挑戰142.40元歷史高位，翻看過往幾年紀錄，滙控7月差不多都是表現向好，似乎7月除了吃靚荔枝外，亦是炒滙控輪的時機。
8號仔繼續令人失望，小小超賺到盆滿缽滿棄船上岸，自己放低個「小小沙灘球」畀捧場客做水泡就話盡晒力，唔理佢哋繼續在苦海浮沉。
早前炒電盈（008）賣資產的投機客，昨日被迫壯士斷臂，股價大跌0.45元或8.1%，收5.10元。有股友話，電盈賣唔成資產，最怕係過去大半年大力催谷的Now寬頻電視尾大不掉，由寶變成草，拖低整體業績。
倉內太A（019）是過去8個交易日首次跌穿80元收市，報79.65元，跌0.75元。今日若不能升回80元之上收市，可能會走一轉短線。
趙飛雲